Marcus 4:1-41
-
DIOSPA GOBIERNUMPAQ IGUALATSIKUYKUNA (1-34)
-
Murukoq nuna (1-9)
-
Jesus imanir igualatsikuykunawan yachatsikunqan (10-12)
-
Murukoq nunapaq igualatsikuyta entienditsikun (13-20)
-
Chiwchitaqa manam canastawantsu tsaparkuyan (21-23)
-
“Mediyanqëki medïdawanmi qamkunapaqpis mediyämunqa” (24, 25)
-
Murukoq nuna pununqan (26-29)
-
Mostäza muru (30-32)
-
Igualatsikuykunawan yachatsikun (33, 34)
-
-
Fuerti vientuta Jesus päratsin (35-41)
4 Yapëmi Jesusqa qocha kuchunchö yachatsikurqan. Y mëtsikaq nunakuna pë këkanqanman juntariyaptinmi, barcuman ëwarnin jamakurir qochapa ichik mas rurinman yëkurqan. Nunakunaqa qocha kuchunchömi quedakuyarqan.+
2 Pëqa igualatsikuykunawanmi imëkata yachatsikur qallëkurqan,+ y kënö nirmi yachatsikoq:+
3 “¡Këta wiyayë! Juk nunam murukoq ëwarqan.+
4 Maqtsikaptinmi wakin murukunaqa chakra kuchun näniman shikwayarqan, tsënam pishqukuna shamur mikukurkuyarqan.
5 Wakinnam mana alläpa allpayoq rumi rumi chakraman shikwayarqan, y janallachö karmi raslla o saslla jeqarayämurqan.+
6 Peru achachëwanmi wanukäriyarqan, y watsin o matsun* janallachö kaptinmi tsakiriyarqan.
7 Wakin murunam kashakuna rurinman shikwayarqan, y kashakuna winarmi pasëpa* tsapaskiyarqan, tsëmi wayuyarqantsu.+
8 Peru wakinqa alli allpamanmi shikwayarqan, y jeqamur y poqurmi alli wayuyarqan: wakin murum treinta masta wayurqan, wakinnam sesenta masta y wakinnam cien masta”.+
9 Tsëpitanam, “wiyakuyta munaq kaqqa, shumaq wiyakutsun” nirqan.+
10 Japallan këkaptinnam döci apostolninkunawan lädunchö këkaqkuna, willakunqan igualatsikuykunapaq tapupar qallëkuyarqan.+
11 Tsënam pëqa nirqan: “Qamkunataqa Teyta Diosmi yanapayäshunki Gobiernumpita sagrädu noticiata entiendiyänëkipaq,+ peru wakinkunapaqqa igualatsikuykunata wiyayanqanllachömi llapampis quedarin.+
12 Tsënöpa wiyarnimpis mana entiendiyänampaq, y rikarnimpis mana yachakuyänampaq. Tsëmi pëkunaqa Teyta Diosman ni imëpis kutiyanqatsu ni perdonta chaskiyanqatsu”.+
13 Y kënöpis nirqanmi: “Kë igualatsikuy ima ninan kanqanta mana entiendikarqa, ¿imanöraq wakin igualatsikuykuna ima ninan kanqanta entiendiyanki?
14 Murukoq nunaqa Diospa palabrantam murun.+
15 Wakin nunakunaqa chakra kuchun näni kinrëman shikwaq murunömi kayan. Diospa palabranta wiyariyaptinmi, Satanas shamur+ shonqunkunachö murushqa këkaq Diospa palabranta ushakaskatsin.+
16 Wakinnam mana alläpa allpayoq rumi rumi chakraman shikwaq murunö kayan. Pëkunaqa Diospa palabranta wiyarmi jinan höra kushishqa chaskikuyan.+
17 Peru watsinkuna o matsunkuna* janallachö kaptinmi, juk tiempu alli karpis, Diospa palabranta cäsukuyanqanrëkur imëkata pasar o imëkata rurar sufritsiyaptinqa, creikuyanqanta dejariyan.
18 Wakinnam kashakuna rurinman shikwaq murunö kayan. Pëkunaqa Diospa palabranta wiyakurpis,+
19 kanan witsanchö* imëkapaq yarpachakur,+ imëkayoq këta munar+ y juktaraq juktaraq munarmi wiyakuyanqanta qonqëkuyan, tsëmi imatapis wayuyantsu.+
20 Wakinnam alli allpaman shikwaq murunö kayan. Pëkunaqa Diospa palabranta wiyakur y shumaq chaskikurmi alli wayuyan: wakinmi treinta masta, wakinnam sesenta masta, y wakinnam cien masta”.+
21 Y kënöpis nirqanmi: “Chiwchitaqa manam canastawan tsaparkuyänampaqtsu o cäma jawanman churëkuyänampaqtsu jipiyan, ¿aw? ¿Manaku chiwchitaqa churakunaman churayänampaq jipiyan?+
22 Manam ima tsaparëkaqpis tsaparëkartsu quedakun ni ima pakarëkaqpis pakarëkartsu quedakun.+
23 Wiyakuyta munaq kaqqa, shumaq wiyakutsun”.+
24 Tsëpitanam kënö nirqan: “Wiyëkäyanqëkita shumaq wiyakuyë.+ Mediyanqëki medïdawanmi qamkunapaqpis mediyämunqa, y mastaran chaskiyanki.
25 Imatapis entiendeqkunaqa mastam entiendiyanqa,+ peru imatapis mana entiendeqkunaqa, ichikllata entiendiyanqantapis qonqëkuyanqam”.+
26 Y kënöpis nirqanmi: “Teyta Diospa Gobiernunqa muruta allpaman maqtseq nunanömi.
27 Pëqa paqaspa punurmi junaqpa sharkun, tsëyaqmi murunqanqa jeqamun y jatun planta tikran, peru pëqa manam musyantsu imanö pasanqanta.
28 Allpaqa kikinllam muruta winatsimun: puntataqa tullunta, tsëpitanam espïganta, y ultimutanam espïgachö gränuta poqutsin.
29 Y cosëcha witsanqa poqushqatanam tsë nunaqa ösiwan segan”.
30 Kënöpis nirqanmi: “¿Imatawanraq Diospa Gobiernunta igualatsishwan, o ima igualatsikuywanraq entienditsikushwan?
31 Teyta Diospa Gobiernunqa, chakraman muruyaptin wakin murupitapis mas uchukllanlla mostäza murunömi.+
32 Muruyaptin jeqamurqa huertachö wakin plantapitapis mas jatunmi tikran. Y jatun rämayoq kaptinmi pishqukunapis tsëchö arwäkuyan o llantukuyan”.
33 Tsënö igualatsikuykunawanmi+ entiendita puëdiyanqanmannö Diospa palabranta nunakunata yachatseq.
34 Rasumpa kaqchöqa, mana igualatsikuywanqa manam pëkunata yachatseqtsu, peru qateqninkunataqa llapantam entienditseq.+
35 Tsë junaq ampïkaptinnam o tsakëkaptinnam* qateqninkunata kënö nirqan: “Qochapa wak tsimpanman ëwashun”.+
36 Tsëmi qateqninkunaqa nunakunata ëwakuyänampaq nïkur barcuwan apayarqan, y lädunkunachöqa mas barcukunapis karqanmi.+
37 Peru illaqpitam feyupa vientur qallëkurqan, tsëmi yaku fuertipa laqcheqsar barcumampis juntëkarqanna.+
38 Peru Jesusqa barcupa sikin kaqchömi jawna jananchö punuykarqan. Tsëmi, “maestru, ¿manaku imapis qokushunki ushakänapaqna këkashqa?” nir riyatsiyarqan o rikchatsiyarqan.
39 Tsënam pëqa sharkur vientuta qayapar qochata kënö nirqan: “¡Upälla kë! ¡Ama büllëtsu!”.+ Tsë höram vientuqa pärarirqan, y llapanmi calmakärirqan.
40 Tsënam Jesusqa nirqan: “¿Imanirtan alläpa mantsakäyanki?* ¿Manaraqku ichikllapis markäkuyanki o yärakuyanki?”.
41 Tsënam pëkunaqa alläpa mantsakar kënö ninakuyarqan: “Rasumpa kaqchöqa, ¿pitan kë nunaqa? Vientupis y qochapis pëtaqa cäsuyantaq”.+
Nötakuna
^ Kënöpis niyanmi: jawan; chapan; sipin.
^ Kënöpis niyanmi: jankat.
^ Kënöpis niyanmi: jawankuna; chapankuna; sipinkuna.
^ O “kanan imëkapis imanö këkanqanchö”. Rikäri “Bibliachö palabrakunata entiendinapaq” neqta.
^ Kënöpis niyanmi: tutapaskiptinnam.
^ O “¿Imanirtan mantsallïshu kayanki?”.