Mateu 7:1-29
7 Ama pitapis juzgayënatsu,+ qamkunapis mana juzgashqa kayänëkipaq.
2 Wakinkunata juzgayanqëkinömi qamkunatapis juzgayäshunki,+ y mediyanqëki medïdawanmi qamkunapaqpis mediyämunqa.+
3 Tsëqa, ¿imanirtan creikoq mayikipa nawinchö päjata rikanki, peru nawikichö këkaq terrädutaqa rikankitsu?+
4 Y nawikichö terrädu këkaptinqa, ¿imanötan creikoq mayikita, ‘nawikichö päjata jipiramushaq’ ninkiman?
5 ¡Ishkë cära nuna! Puntataqa nawikichö terrädutaraq jipi, tsëran creikoq mayikipa nawinchö päjata imanö jipinëkipaq kaqta alli rikanki.
6 Diospa kaqtaqa ama allqukunata qarayëtsu, ni perlasnikikunata kuchikunapaq jitarkuyëtsu,+ tsëkunata jarukacharkur qamkunaman tumëkamur rachir mana ushayäshunëkipaq.
7 Mañakur sïguiyë, y chaskiyankim;+ ashir sïguiyë, y tariyankim; punkuta takakur sïguiyë, y kichapuyäshunkim.+
8 Llapan mañakoqkunam chaskiyan,+ llapan asheqkunam tariyan, y punkuta llapan takakoqkunatam kichapuyanqa.
9 Rasumpa kaqchöqa, ¿mëqëkitan tsurikikuna tantata mañakuyäshuptiki rumin qarëkuyankiman?
10 O pescäduta mañakuyäshuptikiqa, ¿manachi culebratatsu qarëkuyankiman aw?
11 Tsëqa, qamkuna mana alli nuna këkarpis tsurikikunata allikunata qarëkäyaptikiqa, ciëluchö këkaq Teytëkikunanäqa,+ ¡masraqmi pëman mañakoqkunata allikunata qaranqa!+
12 Tsëmi, alli tratayäshunëkita munayanqëkinölla pitapis tratayë.+ Tsëtam Leychöpis y Diospa Willakoqninkuna Qellqayanqanchöpis nin.+
13 Kichki punkupa yëkuyë.+ Jatun punkuyoq anchu näniqa ushakëmanmi chätsikun, y mëtsikaqmi tsë punkupa yëkuyan;
14 peru kawëman chätsikoq llanu näniqa kichki punkuyoqmi, y wallkaqllam tsë nänita tariyan.+
15 Cuidakuyë Diospa willakoqnin tukoqkunapita,+ pëkunaqa üshanö vistishqam qamkunaman shayämun,+ peru shonqunkunachöqa mallaqashqa atoqnömi* kayan.+
16 Rurayanqampitam pëkunataqa reqiyanki. Manam kashakunapitatsu üvasta pallayan, ni cardonkunapitatsu hïgusta pallayan, ¿aw?+
17 Tsënöllam alli plantaqa alli frütata wayun, peru mana alli plantaqa mana sirweq frütatam wayun.+
18 Juk alli plantaqa, manam mana sirweq frütata wayuntsu, ni mana alli plantaqa alli frütata wayuntsu.+
19 Alli frütata mana wayoq plantakunataqa walluskirmi ninaman jitarkuyan.+
20 Tsënöllam tsë nunakunataqa rurayanqampita reqiyanki.+
21 Manam llapan ‘Señor, Señor’ nimaqkunatsu ciëluchö këkaq Teyta Diospa Gobiernunman yëkuyanqa, sinöqa ciëluchö këkaq Teytäta cäsukoq kaqkunallam.*+
22 Tsë junaqqa mëtsikaqmi ‘Señor, Señor,+ ¿manaku Dios musyatsikunqanta jutikichö willakuyarqä, jutikichö demoniukunata qarquyarqä, y jutikichö milagrukunata rurayarqä?’ niyämanqa.+
23 Tsënam noqaqa pëkunata nishaq: ‘¡Noqaqa qamkunata manam ni imëpis reqirqötsu!* ¡Noqapita witikuyë, mana allikunata ruraqkuna!’.+
24 Tsëmi, kë ninqäkunata cäsukur ruraqqa, qaqa jananchö wayinta ruraq alli juiciuyoq nunanö kanqa.+
25 Tamya qallëkuptin yaku atskayar y fuertipa vienturmi tsë wayita apakuyta munarqan, peru qaqa jananchö rurashqa karmi tsë wayiqa juchurqantsu.*
26 Peru kë ninqäkunata wiyëkar mana cäsukoqqa, arëna jananchö wayinta ruraq upa nunanömi kanqa.+
27 Tamya qallëkuptin yaku atskayar y fuertipa vienturmi tsë wayita kuyuskatsirqan,+ tsënam tsë wayiqa juchur* pasëpa* ushakarqan”.
28 Tsëkunata Jesus parlar ushariptinnam, imanö yachatsikunqanta wiyar tsëchö këkaq nunakuna alläpa espantakuyarqan.+
29 Pëqa Teyta Diospita carguta chaskishqa nunanömi pëkunata yachatsirqan,+ y manam Ley qellqaqninkunanötsu.
Nötakuna
^ Griëgu idiömachöqa “löbunömi” ninmi. Tsë animalqa atoq niraqmi, peru mas jatunmi.
^ O “Teytä munanqanta ruraq kaqkunallam”.
^ Kënöpis niyanmi: reqiyarqoqtsu.
^ Kënöpis niyanmi: laqmarqantsu.
^ Kënöpis niyanmi: laqmar.
^ Kënöpis niyanmi: jankat.
