Proverbius 15:1-33
15 Alli shimimpa parlapäriyaptinqa cölerashqa këkarpis alliyäriyanmi,+peru qayapëpa parlaparqa masmi cöleratsiyan.+
2 Yachaq nunakuna parlarqa, wakinkunata yanapanampaq kaqman pensëkurmi parlayan,+peru pensëta mana yachaq nunakunaqa imatapis llutam parlariyan.
3 Teyta Jehoväqa alli nunakunay mana alli nunakuna imatapis rurayanqantam mëtsëman rikëkan.+
4 Alli parlakoq nunaqa shumaq parlaparmi nuna mayinta kushiratsin,+peru ulikoq o llullakoq nunaqa, nuna mayintam llakitsin.
5 Mana entiendikoq wamraqa manam papänin corregiptin chaskikuntsu,+peru entiendikoq wamraqa corregiptin cäsukunmi.+
6 Allita ruraq nunapa wayinchöqa imëka väleq cösaskunam kan,peru mana alli nunataqa, tarinqankunam problëmakunaman chäratsin.+
7 Yachaq nunaqa pïmëtapis allitam entienditsin,+peru imatapis mana yachaq nunaqa manam tsë rurëta yachantsu.+
8 Teyta Jehoväqa alläpam melanan mana alli nunakuna animalkunata pishtëkur pëpaq rupatsiyaptin,+peru alli nunakuna mañakuyaptinqa alläpam kushikun.+
9 Mana alli nunakuna lluta portakuyanqantaqa Teyta Jehovä chikinmi,+peru imëkanöpapis alli portakoqkunataqa kuyanmi.+
10 Alli nänipita yarqukureq cuenta mana alli portakur qallëkoq nunaqa, manam corregiyaptin gustantsu,*+y corregiyänanta mana gustaqkunaqa wanuyanqam o wañuyanqam.+
11 Teyta Jehoväqa Sepultüramampis* y ushakätsikoq sitiumampis* rikëkanmi,+¿tsëtsuraq mana rikanmantsu nunapa shonqunta?+
12 Burlakoq nunaqa manam corregiyaptin gustantsu,+ni manam yachaq nunakunata tapukuntsu.+
13 Nunakuna shonqunkunachö kushishqa kayanqanqa cärankunachömi rikakun,peru shonqunkunachö llakishqa karqa llakishqam rikakuyan.+
14 Imatapis alli entiendeq nunaqa masllam musyëta munan,+peru imatapis mana entiendeq nunakunaqa mana allikunallatam yachakuyan.+
15 Llakishqalla kakoq* nunapaqqa cada junaqpis mana allillam,+peru kushishqa nunaqa, cada junaqmi kushishqa kawakun.*+
16 Mëtsika riquëzayoq kar yarpachakurlla kawakunqantsikpitaqa,+wallkalla kapamashqapis Teyta Jehoväta respetar* kawakunqantsikmi mas alliqa.+
17 Mas alliqa, imallata* mikurpis kuyanakur kawakunqantsikmi,+alli ëtsata* mikur chikinakurlla kawakunqantsikpitaqa.+
18 Mana alli geniuyoq nunaqa piwampis pleyturllam këkan,+peru pacienciakoq nunaqa cölerashqatapis calmaratsinmi.+
19 Qela nunapa näninqa kasha pürum këkan,+peru alli nunapa näninqa limpium këkan.+
20 Wamran cäsukoq kaptinqa papäninqa alläpam kushikun,+peru mana entiendikoq nunaqa mamänintam desprecian.+
21 Juiciunnaq nunataqa mana allikunata rurëmi gustan,+peru alli entiendeq nunaqa imatapis allillatam ruran.+
22 Imata rurëta munarpis, shumaq mana willanakurqa* manam alliqa yarqapakuyanqatsu,peru yachaq nunakunata tapukurqa imata rurarpis allim yarqapakuyanqa.+
23 Imatapis tapuyaptin allita contestaq nunaqa kushikunmi,+y conviëneqchö imatapis parlakurinqanqa alläpa shumaqmi.+
24 Alli pensëta yachaq nunaqa kawëman apakoq nänipam ëwan,+y wanuyman* apakoq nänipitaqa witikunmi.+
25 Orgullösu nunapa wayintaqa Teyta Jehovämi juchuratsinqa,*+peru viuda warmipa chakrampa lindëruntaqa cuidanqam.+
26 Mana alli nunakuna imatapis rurayänampaq parlayanqantaqa Teyta Jehovä chikinmi,+peru nunakuna allillata parlakuyaptinqa kushikunmi.+
27 Nuna mayimpa imantapis apakoq nunaqa familiantam problëmaman* chätsin,+peru imatapis mana chaskipakoq kaqqa allim kawakunqa.+
28 Allita ruraq nunaqa imata tapuyaptimpis alliran pensan contestanampaq,+peru mana alli nunaqa imatapis llutallam parlarin.
29 Mana alli nunakuna mañakuyaptinqa, Teyta Jehoväqa manam wiyëtapis munantsu,peru alli nuna mañakuptinqa wiyanmi.+
30 Pillapis kushishqa rikäramashqaqa kushikuntsikmi,*y alli noticiata willaramashqapis kushikuntsikmi.*+
31 Alli kawakunampaq corregiyaptin cäsukoq kaqqa,yachaq nunakunawanmi kawanqa.+
32 Corregiyaptin mana chaskikoq nunaqa vïdantam desprecian,+peru corregiyanqanta chaskikoq kaqqa alli entiendeqmi tikranqa.+
33 Teyta Jehoväta respetarqa,* yachakunqëkimannömi kawëta yachakunki,+y humildi kaptikiqa respetayäshunkim.+
Nötakuna
^ O “alläpana consejëkäyanqantam pensayan”.
^ O “Abadonmampis”. Rikäri “Bibliachö palabrakunata entiendinapaq” neqta.
^ O “Sufreq”.
^ O “alli allita mikurlla kawakun”.
^ Hebreu idiömachöqa “mantsar” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “corralninchö cebashqa töruta” ninmi.
^ Hebreu idömachöqa “verdürallata” ninmi.
^ O “tapunakurqa”.
^ O “Sepultüraman”. Tsënö nirqa, Seolpaqmi parlëkan. Rikäri “Bibliachö palabrakunata entiendinapaq” neqchö “Seol” neqta.
^ Kënöpis niyanmi: laqmaratsinqa.
^ O “penqakuyman”.
^ Hebreu idiömachöqa “tullutam kallpayoqta tikratsin” ninmi.
^ Hebreu idiömachöqa “shonqutam kushitsin” ninmi.
^ Hebreu idiömachöqa “mantsarqa” ninmi. Rikäri “Bibliachö palabrakunata entiendinapaq” neqta.
