Proverbius 20:1-30
20 Vïnuta alläpa upoq nunaqa penqakuypaqmi portakun,*+ alcoholwan machakoq nunataqa manam ni pï sujetëta puëdintsu.+
Vïnuwan y alcoholwan machakoq nunaqa manam yachaq nunatsu.+
2 Leon* qapariptin* mantsaqnöran gobernantitaqa mantsëkuyan,+gobernantita cöleratseq nunaqa vïdantam peligruman churan.+
3 Piwampis discutita mana munaq nunataqa respetayanmi,+peru upa nunaqa discutirmi imëka mana allikunaman chärin.+
4 Qela nunaqa manam tamya witsan yapyakuyta* munantsu,tsëmi cosëcha witsanqa imampis mana kaptin mañapakur purin.*+
5 Juk nuna shonqunchö imatapis pensëkanqanqa, hondu pözuchö këkaq yakunömi,tsëtaqa yakuta shumaqlla sutamoqnömi yachaq nunaraq yachëllapa parlatsin.
6 Mëtsikaqmi kuyakoq* kayanqanta alabakuyan,peru rasumpa confiakuypaq nunataqa, ¿piraq tarinman?
7 Alli nunaqa jutsata* mana rurashpam kawakun,+y tsënö kawakunqampitam tsurinkunapis kushishqa kawakuyanqa.+
8 Juk gobernanti juzganampaq jamakurirqa,+rikärirllanam cuentata qokurin pikuna jutsata* rurayashqa kayanqanta.+
9 Manam ni pï kënö nita puëdintsu:
“Noqaqa shonqüta limpiuyätsirqönam.*+ Llapan jutsata* ruranqäpitam limpiuna këkä”.+
10 Exactuta mana pesaq pësatay complëtuta mana mideq medïdataqa* Teyta Jehoväqa alläpam melanan.+
11 Juk wamraqa* imatapis ruranqankunawanmi,musyatsikun alli wamra kanqanta o mana alli wamra kanqantapis.+
12 Wiyanqantsik rinritay rikanqantsik nawitaqa Teyta Jehovämi kamashqa.+
13 Punukurlla kakurqa waktsayankim,+sharkur trabajë, tsëqa imëpis pacha juntam kanki.+
14 Imatapis ranteqkunaqa, “këqa manam allitsu, këqa manam shumaqtsu” nirmi imatapis rantiyan.
Peru tsëpita ëwakurqa, “barätullachömi rantiramurqö” nirmi alabakuyan.+
15 Örupis y lamar rurinchö shumaq rumikunapis* shumaqmi,peru yachaq nuna imatapis parlakunqanmi mas shumaqqa.+
16 Jukpa jaqanta pagakunampaq juk nuna änikushqa kaptinqa,+ röpanta prenda quedatsikuy.
Juk nacion warmipa jaqanta pagakunampaq änikushqa kaptinqa garantiata mañë.+
17 Nuna mayinta sakyar tarinqan mikuyqa, nunapaqqa alläpam mishkin,peru tsëpitaqa shiminchömi mëtsika aqunö tikrarin.+
18 Alli tapukuskir imatapis rurayaptinqa allim yarqun,+guërrachö ganëta munarqa alli consejakoqkunataraq tapukuy.+
19 Cuentustëru nunaqa jukkuna parlakuyanqanta wiyarirmi willakurna purikurëkan.+
Cuentu puritsita gustaqkunawanqa ama juntakuytsu.
20 Papäninta y mamäninta maldiceqkunaqa,ampirkuptin o tsakarkuptin* aktsin upireqnömi kayanqa.+
21 Qochikur o qechukur tariyanqan herenciawanqa,manam kushishqaqa kayanqatsu.*+
22 Ama kënö nitsu: “Kananqa noqapis ruramanqannöllam rurarishaq”.+
Tsëpa rantinqa, Teyta Jehoväman confiakuy,+ pëmi yanapashunki.+
23 Exactuta mana pesaq pësata* y complëtuta mana pesaq balanzataqa,Teyta Jehoväqa alläpam melanan.
24 Teyta Jehovällam nunataqa yanapan imanö kawanampaq,+peru kikin nunaqa manam imanö kawanampaq kaqta musyantsu.
25 Manaraq alli pensar, “Teyta Diostam änirirqö” neq nunaqa, trampaman ishkishqanönam këkan.+
Peru alli pensarirqa, cumplita mana puëdinampaq kaqtam cuentata qokurinqa.+
26 Alli yachaq gobernantiqa, mana alli nunakunata rakirirmi,+trïguta jarutsiyänan ruëdawan jarutsir ushakäratsin.+
27 Nuna parlakunqanqa,* Teyta Jehoväpaqqa aktsi cuentam,parlakuyanqanwanmi musyatsikuyan shonqunkunachö imanö kayanqanta.
28 Kuyakoq* kar y parlanqanta cumplirmi gobernantiqa alli kanqa.+
Kuyakoq karqa imëpis gobernanqam.+
29 Jövinkunataqa kallpasapa kayanqampitam alabayan,+y awkinkunanam soqu aqtsayoq kar shumaq rikakuyan.+
30 Castiguqa* mana alli rurëkunata dejanapaqmi yanapamantsik.+
Corregimanqantsikqa* shonquntsikchö mana alli kanqantsikta corregikunapaqmi yanapamantsik.
Nötakuna
^ O “nunataqa alläpam penqapäyan”.
^ O “Mallwa leon”.
^ Kënöpis niyanmi: qayaraptin.
^ Kënöpis niyanmi: jarukuyta.
^ O capazchi “ashirpis tarinqatsu”.
^ O “alläpa kuyakoq”.
^ Kënöpis niyanmi: pecäduta.
^ Kënöpis niyanmi: pecäduta.
^ O “purificarqönam”.
^ Kënöpis niyanmi: pecäduta.
^ O “juk cläsi pësa rumitaqa, y maslla y mënuslla yëkoq medïdataqa”.
^ O “jövinqa”.
^ Hebreu idiömachöqa “coralkunapis” ninmi.
^ Kënöpis niyanmi: tutaparkuptin.
^ O “manam Teyta Dios bendicinqatsu”.
^ O “ishkë cläsi pësa rumita”.
^ Hebreu idiömachöqa “Nunapa jamaninqa” ninmi.
^ O “Alläpa kuyakoq”.
^ Hebreu idiömachöqa “Herïdaqa” ninmi.
^ Hebreu idiömachöqa “Maqamanqantsikqa” ninmi.
