Rut 1:1-22
1 Israel nacionchö nunakunata juezkuna dirigiyanqan witsanmi,+ mikuy mana kaptin tsë nacionchö alläpa mallaqë karqan. Tsëmi juk nunaqa warminta y ishkan tsurinkunata aparkur, Judächö Belen+ markapita Moabta ëwakurqan.+
2 Tsë nunapa jutinqa Elimëlecmi* karqan, warmimpanam Noemï* y tsurinkunapanam Mahlon* y Kilion* karqan. Pëkunaqa Efräta markapitam kayarqan. Judächö Belen markatam Efräta nir reqiyaq. Moabman chëkurnam tsëchö kawakuyarqan.
3 Tiempu pasariptinnam Elimëlecqa wanukurqan. Tsëmi warmin Noemïqa ishkan wamranllawanna quedakurqan.
4 Tsëpitanam wamrankunaqa moabïta shipashkunawan casakuyarqan. Juknimpam jutin Orpä karqan y juknimpanam Rut+ karqan. Tsëchömi chunka watapanö kawakuyarqan.
5 Tsëpitanam Mahlonwan Kilionpis wanukuyarqan, tsëmi Noemïqa wamrannaq y qowannaq o runannaq* quedakurqan.
6 Peru Noemïqa Moabchö këkarmi, wiyashqa karqan Jehovä Dios markampaq yarpärishqa kanqanta y alli cosëchakunawan* bendicikanqanta. Tsëmi ishkan lumtsuyninkunawan markanman kutikurqan.
7 Noemïqa kawakunqan sitiupitam Rutwan y Orpäwan Judäman ëwakurqan.
8 Peru Judäman kutirëkarnam, Noemïqa ishkanta kënö nirqan: “Mas alliqa kanqa mamëkikunaman kutikuyanqëkim. Imanömi noqata y wamräkunata* alläpa kuyayämarqunki,+ tsënöllam qamkunatapis Teyta Jehovä kuyayäshunki.
9 Alli majata tarïkur alli kawakuyänëkipaqmi* ishkëkitapis Teyta Jehovä yanapayäshunki”.*+ Tsënö nïkurmi ishkankunata mutsarirqan, y pëkunanam alläpa waqayarqan.
10 Y kënömi niyarqan: “Manam dejayashqëkitsu. Qamwanmi ëwayäshaq y markëkichömi kawakuyäshaq”.
11 Noemïnam nirqan: “Kutikuyë wamralläkuna. ¿Imanirtan noqawan ëwëta munayanki? Noqaqa manam wamrayoq këta puëdïnatsu pëkunawan casakuyänëkipaq.+
12 Kutikuyë wamralläkuna. Noqaqa casakunäpaqpis chakwannam kä. Y kanan paqas casakur wamrayoq kaptïpis,
13 ¿poquyanqanyaqtsuraq shuyaräyankiman pëkunawan casakuyänëkipaq? ¿Pëkunata shuyarartsuraq casakuyankimantsu? Manachi wamralläkuna. Jehovä Diosqa manam yanapamannatsu,* tsëmi qamkuna sufrikäyanqëkita rikar noqapis alläpa llakikü”.+
14 Tsënam pëkunaqa, yapë waqayarqan. Tsëpitanam Orpäqa suegranta mutsëkur kutikurqan, peru Rutqa manam dejëta munarqantsu.
15 Tsëmi Noemïqa, “rikë, viudayashqa lumtsuy mayikiqa markanman y santunkuna adoraqmi kutikan. Qampis pëwan kutikuy” nirqan.
16 Rutnam nirqan: “Amana dejarinaqpaq nimënatsu, ama qampita rakikäkurinäpaq nimëtsu. Noqaqa ëwanqëkitam mëtapis ëwashaq, y pununqëkichömi punushaq, markëkim markä kanqa, y Diosnikim Diosnï kanqa.+
17 Wanunqëkichömi wanushaq o wañushaq, tsëchömi pampayämanqa. Wanurninran qampitaqa rakikäshaq. Peru kawëkarnin qamta dejapteqqa, Jehovä Dios castiguëkamätsun”.
18 Tsënö nir Rut dejëta mana munaptinmi, Noemïqa imatapis nirqannatsu.
19 Y ishkankunam Belen+ markata ëwakuyarqan. Chäriyaptinqa, llapan rikaqkunam espantakuyarqan. Y warmikunam, “¿imatan Noemïta pasëkushqa?” niyarqan.
20 Tsënam Noemïqa pëkunata nirqan: “Llapanta Puëdeq Diosmi alläpa llakitsimashqa.+ Amana Noemï* niyämënatsu, tsëpa rantinqa Mara* niyämë.
21 Këpita ëwakurqa imëkayoqmi karqä, peru kananqa jinëllatam Teyta Jehovä kutitsimashqa. ¿Imanirtan Noemï nir qayayämanki? Jehovämi conträ churakashqa. Llapanta Puëdeq Diosmi alläpa sufritsimashqa”.+
22 Tsënömi Noemïqa, moabïta lumtsuynin Rutwan Moabpita+ Belen markata kutikurqan. Cebäda cosëcha+ qallanqan witsanmi chäyarqan.
Nötakuna
^ Tsë jutiqa, ‘Diosnïmi gobernaq’ ninanmi.
^ Tsë jutiqa, ‘kushitsimaq’ ninanmi.
^ Capazchi tsë jutiqa hebreu idïomachöqa, “wanunëkaq o qeshyanëkaq” ninan palabrapita karqan.
^ Tsë jutiqa, ‘kallpannaq tikrëkaq o ushakëkaq’ ninanmi.
^ Kënöpis niyanmi: ollqunnaq.
^ Hebreu idiömachöqa “tantakunawan” ninmi.
^ O “wanushqana nunakunata”.
^ O “qarëkuyäshunki”.
^ Hebreu idiömachöqa “jamariyänëkïpaq juk sitiuta” ninmi.
^ O “Jehovä Diospa makinmi conträ këkan”.
^ Tsë jutiqa, ‘kushitsimaq’ ninanmi.
^ Tsë jutiqa, ‘alläpa llakitsishqa’ ninanmi.
