Salmus 106:1-48
-
Israelïtakuna mana agradecikoq kayanqan
106 ¡Teyta Jehoväta* alabayë!
Allikunata ruranqampita Teyta Jehoväta agradecikuyë.+
Pëqa imëpis alläpa kuyakoqllam këkan.+
2 Teyta Jehovä, ¿piraq willakunman poderösu kar ruranqëkikunapitao ruranqëkikuna alläpa shumaq y alabëpaq kanqanta?+
3 Justiciata y alli kaqllata ruraqkunam,imëpis kushishqa kawakuyan.+
4 Sirwiyäshoqnikikunata yanaparqa, noqatapis yarpëkamanki Teyta Jehovä.+
Qamqa salvakoqmi kanki, cuidëkallämanki,
5 akrashqëki nunakunata yanaparqa, noqatapis yanapëkallämanki.+
Pëkuna kushikuyanqannömi kushikushaq.
Y sirwishoqnikikunawan juntum kushishqa alabashqëki.
6 Teyta Dios unë kastäkunanömi jutsata* rurayarqö.+
Llutantam rurayarqö, mana allikunatam rurayarqö.+
7 Egiptuchö unë kastäkunaqa, pëkunapaq imëkata rurëkaptikipismana kaqpaqmi churayäshurqëki y alläpa kuyakoq kanqëkitam qonqëkuyarqan.
Tsëmi Puka lamar kuchunchö contrëki churakäyarqan.+
8 Teyta Diosqa jutin reqishqa kananta munarmi,y puëdeq kanqanta musyayänampaqmi+ salvarqan.+
9 Puka lamarta qayapëkuptinmi, yakuqa tsakiskirqan.
Llapankunatam tsaki patsapa pasatsirqan.+
10 Chikeqninkunapitam salvarqan,+chikeqninkunapitam librarqan.+
11 Chikeqninkunataqa yakum tsaparkurqan,manam jukllëllapis kawëkar quedarqantsu.+
12 Tsëta rikarmi unë awilükunaqa änikunqanman markäkuyarqan o yärakuyarqan,+y cantarmi alabayarqan.+
13 Peru tsëpitaqa llapan ruranqantam qonqëkuyarqan.+
Imata rurayänampaqpis manam Teyta Diosraq parlapänanta* shuyäyarqantsu.
14 Tsunyaq jirkachö këkarqa munëninkunatam rurayarqan,+Teyta Diospa pacienciantam ushakätsita munayarqan.+
15 Mañakuyanqanta rurarpis, Teyta Diosqa qeshyawanmi castigarqan,tsëmi uyuyar wanuyarqan.+
16 Campamentuchö këkarmi Moisespaqy Teyta Jehovä+ akranqan Aaronpaq rimayarqan.+
17 Tsëmi patsa kichakäriptin Datan jeqarkurqan,y Abiramwan këkaqkunatapis patsam tsaparkurqan.+
18 Yanapaqninkunatapis ninam ruparqan;mana alli nunakunaqa nina rupaptinmi wanuyarqan o wañuyarqan.+
19 Horeb jirkachömi metalta tsulluykatsir mallwa töruta rurayarqan,tsë santuman qonqurikurmi adorayarqan.+
20 Poderösu Diosta adorayänampa rantinmi,pëkunaqa, qewa mikoq töru niraqta rurëkur adorayarqan.+
21 Pëkunapaq Egiptuchö imëka ruranqanta rikashqa këkarpis,+salvaqnin Teyta Diostaqa qonqëkuyarqanmi.+
22 Teyta Diosqa, Campa+ nacionninchömi imëkakunata rurarqan;Puka lamar+ kuchunchömi espantëpaqkunata rurarqan.
23 Teyta Diosqa pëkunata ushakätsitam munarqan.
Tsënam akranqan Moisesqa, pëkunata mana ushakätsinampaq rogakurqan,tsëmi ushakätsirqantsu.+
24 Pëkunaqa Teyta Dios äninqan markakunatapis manam munayarqannatsu;+änikunqanmampis manam markäkuyarqantsu o yärakuyarqantsu.+
25 Carpa* wayinkunachömi reclamakur kayarqan.+
Jehovä parlapanqantapis manam cäsuyarqantsu.+
26 Tsëmi Teyta Diosqa,pëkunata tsunyaq jirkachö ushakätsinampaq nirqan.+
27 Y pëkunapa kastankunata chikeq nacionkuna wanutsiyänampaqy mëtsë nacionkunapa ëwakuyänampaqmi nirqan.+
28 Tsëpitanam pëkunaqa, Peor niyanqan sitiuchö Baal santuta adorayarqan;+y wanushqakunapaq cosinayanqan mikuytam mikuyarqan.
29 Tsëkunata rurar cöleratsiyaptinmi,+Teyta Diosqa castigarqan.+
30 Peru jutsata* rurashqa nunakunata,Finehas wanuratsiptinran Teyta Diospa cöleranqa pasarqan.+
31 Tsëta ruranqampitam Finehastaqa,alli ruraq nuna kanqampita imëpis yarpäyanqa.+
32 Pëkunaqa Meribä* yaku kuchunchömi Teyta Diosta yapë cöleratsiyarqan.
Pëkuna tsënö kayanqampitam Moisespis castïguta chaskirqan.+
33 Alläpa cöleratsiyaptinmi,shimin venciptin llutanta parlarqan.+
34 Llapan markakunata ushakätsiyänampaq Jehovä mandëkaptinmi,+ushakätsiyarqantsu.+
35 Tsëpa rantinqa tsë nacionchö nunakunawan juntakurmi,+pëkuna rurayanqanta rurayarqan.+
36 Tsë nunakunapa santunkunatam adorayarqan.+
Tsëkunata rurarmi imëka mana alliman chäyarqan.+
37 Demoniukunata adorarmi warmi wamrankunatay ollqu wamrankunata rupatsiyaq.+
38 Culpannaq nunakunatam wanutsiyarqan.+
Canaanchö santukunata+ adorarmi warmi wamrankunatay ollqu wamrankunata rupatsiyarqan.
Tsënö mana allita rurayaptinmi tsë markakunaqa limpiunatsu kayarqan.
39 Mana allikunata rurarninmi melanëpaqna kayarqan.
Teyta Diosta dejarmi* santukunatana adorayarqan.+
40 Tsëmi Teyta Jehoväqa sirweqninkunata castigarqan.
Akranqan nunakunatam melanarqan.
41 Kutin kutinmi juk nacion nunakunapa makinchö dejarqan,+chikeqninkuna gobernanampaqmi dejarqan.+
42 Chikeqnin nunakunam sufritsiyaq,y pëkunapa poderninchömi kayaq.
43 Teyta Diosqa, kutin kutinmi salvaq.+
Peru pëkunaqa mana cäsukurmi mana allikunata rurayaq,+tsëmi jutsata* rurayanqampita penqakushqa ushayaq.+
44 Peru Teyta Diosqa sufriyanqantam rikaq,+y yanapëkunampaq rogakuyaptimpis wiyaqmi.+
45 Tsënö sufriyanqanta rikarmi, acuerdu rurayanqantapis yarpäreq.
Y alläpa kuyakoq karmi llakipaq.*+
46 Teyta Dios munaptinmi,chikeqnin nunakunapis pëkunata llakipäyaq.*+
47 Teyta Jehovä, Diosnïkunam kanki, salvëkayämë.+
Mëtsë nacionchömi rakikar ushashqa këkäyä,markäkunaman kutïkatsiyämë.+
Tsënöpam sagrädu jutikipita agradecikur kushishqa alabayashqëki.+
48 Israelpa Diosnin Jehovä imëyaqpis alabashqa këkullätsun.+
Y mëtsë nacionchö nunakuna,“¡Tsënö kallätsun!”* niyätsun.
¡Teyta Jehoväta* alabayë!
Nötakuna
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ Kënöpis niyanmi: pecäduta.
^ O “consejananta”.
^ Kënöpis niyanmi: Toldu.
^ Kënöpis niyanmi: pecäduta.
^ Hebreu idiömachöqa “pleytuy o discuti” ninmi.
^ O “qowanta o runanta jukwan engañaq warminö traicionarmi”.
^ Kënöpis niyanmi: pecäduta.
^ Kënöpis niyanmi: ankupaq; kuyapaq.
^ Kënöpis niyanmi: ankupäyaq; kuyapäyaq.
^ O “Amen”.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
