Salmus 116:1-19
116 Teyta Jehoväqa qayakuptï wiyamanmi, rogakuptï yanapamanmi.
Tsëmi pëtaqa kuyä.+
2 Qayakunqäta wiyamaptinmi,*+pëmanqa wanukunqäyaq o wañukunqäyaq qayakushaq.
3 Wanuypis o wañuypis imëka waskawannömi watamëta munarqan.
Wanunäpaqnam këkarqä.+
Alläpam llakikurqä y yarpachakurqä.+
4 Tsëmi Teyta Jehoväman kënö nir rogakurqä:+
“Teyta Jehovä salvëkallämë”.
5 Teyta Jehoväqa alläpa allim, imëkatapis allillata ruraqmi.+
Teyta Diosnintsikqa llakipäkoqmi.*+
6 Teyta Jehoväqa, mana yachaqkunatam cuidan.+
Alläpa llakishqa këkaptïmi yanapamarqan.
7 Teyta Jehoväqa kuyamarmi yanapamashqa.
Kananqa yapëmi tranquïlu këkä.
8 Waqanäpaq kaqpitay mana alliman ishkinäpaq kaqpitam salvamarqunki.
Wanuypitapis o wañuypitapis salvamarqunkim.+
9 Kawëkarqa Teyta Jehovätam sirwikäshaq.
10 Teyta Diosman markäkurmi o yärakurmi parlarqä.+
Alläpam sufrirqä.
11 Alläpa mantsakarmi nirqä:
“Llapan nunakunapis ulim o llullam kayan”.+
12 Imëkanöpa Teyta Jehovä yanapamanqantaqa,¿imanöraq kutitsishaq?
13 Cöpachö qaramanqantam chaskishaq.
Teyta Jehoväpa jutintam parlashaq.
14 Teyta Jehoväta äninqätaqa,llapan sirweqninkuna rikëkäyaptinmi cumplishaq.+
15 Sirweqninkuna wanuyaptinqa o wañuyaptinqa,Teyta Jehoväqa alläpam llakikun.+
16 Sirweqniki karmi, Teyta Jehovä rogakamü.
Sirwishoqniki warmipa wawanmi kallä.
Qammi cadenashqa këkaptï salvamarqunki.+
17 Agradecikurnikim qarëkunata rupatsimushaq.+
Teyta Jehovä, jutikitam parlashaq.
18 Teyta Jehoväta äninqätaqa,+llapan sirweqninkuna rikëkäyaptinmi cumplishaq.+
19 Tsëtaqa cumplishaq Jerusalen markachömi;Teyta Jehoväpa templumpa patiunkunachö.+
¡Teyta Jehoväta* alabayë!+
Nötakuna
^ O “wiyamänampaq muchkimuntinmi o umpumuptinmi”.
^ Kënöpis niyanmi: ankupäkoqmi; kuyapäkoqmi.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
