Salmus 147:1-20
147 ¡Teyta Jehoväta* alabayë!
Teyta Diosnintsikta cantar alabëqa* alläpa shumaqmi.
Pëta alabëqa, ¡alläpa kushikuypaqmi y alläpa allim!+
2 Mëtsë nacionkunachö këkaq israelïtakunata kutitsimunampaqmi,+Teyta Jehoväqa Jerusalen markata shärikätsin.+
3 Teyta Diosqa, shonqunkunachö alläpa llakishqa këkaqkunatam yanapëkan,y herïdankunata vendaqnömi, nanatsikur këkaqkunata jampikan.
4 Llapan estrëllakuna ëka kanqantapis musyanmiy llapantam jutimpa reqin.+
5 Teyta Diosnintsikwanqa manam ni pï igualantsu,+pëqa alläpa poderösum,pëllam imëkatapis musyan.+
6 Teyta Jehoväqa alli shonquyoqkunatam yanapan,+peru mana alli nunakunataqa penqakuymanmi churan.
7 Agradecikur Teyta Jehoväpaq cantayë,arpata tocar y cantar Teyta Diosnintsikta alabayë.
8 Ciëluchö pukutëta yuritseqtay patsaman tamyatsimoqta,+jirkakunachö imëka plantakunata winatseqta alabayë.+
9 Pëmi tukuyläya animalkunata pacha juntata katsin,+y cuervu pishqupa wawankuna mallaqarnin waqayaptimpis mikunankunam qaran.+
10 Teyta Diospaqqa, cawallu puëdeq kanqampis+y nunakuna alli cörreq kayanqampis mana kaqllam.+
11 Teyta Jehoväqa pëta respetayaptin,*+y alläpa kuyakoq kanqanman confiakuyaptinmi kushikun.+
12 Jerusalen marka, Teyta Jehoväta alabë,Sion jirka, Teyta Diosnikita alabë.
13 Pëmi punkuykikunapa trancanta alli següruta katsin,wamrëkikunata bendicin,
14 markëkikunachö alli kawakuyänëkipaq yanapayäshunki+y mëtsika alli trïguwan bendiciyäshunki.+
15 Pëmi patsatapis mandan,tsëmi ninqanqa mëtsëmampis ras o sas chärin.
16 Rashtatsimunqampis* yuraq millwanöran rikakun+y qajapatapis uchpatanöran mashtaramun.+
17 Pakishqa tantata fäcil-lla maqtseqnömi runtu tamyatapis tamyatsimun+y tsë alalaptinqa manam ni pï aguantantsu,+
18 pë mandakuptinmi tsullur ushakany vientutsimuptinmi+ yakupis ëwar qallëkun.
19 Jacobtam palabranta musyatsin,y Israeltam mandamientunta y leyninta willan.+
20 Teyta Diosqa, manam juk nacionkunachö täkoq* nunakunawanqa tsëta rurashqatsu.+
Tsëchö kawaqkunaqa manam ichikllatapis leyninkunata musyayantsu.
¡Teyta Jehoväta* alabayë!+
Nötakuna
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
^ O “Diosnintsikpaq müsicata toquëqa”.
^ Hebreu idiömachöqa “mantsayaptin” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: Rapitsimunqampis; Jankatsimunqampis.
^ Kënöpis niyanmi: täraq; päraq.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.
