Salmus 22:1-31
Cantaqkunata dirigeqpaq. “Patsa waräriptin luychu yarqamunqan höra” niyanqan cancion.* David qellqanqan salmus.
22 Dios Yaya, Dios Yaya, ¿imanirtan dejaramarqunki?+
¿Imanirtan salvëkallämankitsu?
¿Imanirtan këläya sufrir qayakëkämuptï wiyamankitsu?+
2 Teyta Dios, paqasta junaqtamqayakamü, peru manam wiyamankitsu.+
3 Qamqa Teyta Dios alläpa limpium kanki.+
Israel nunakunam alabayäshunki.
4 Unë awilükunaqa qammanmi confiakayämurqan,+y qamqa salvarqëkim.+
5 Qamman qayakayämuptinqa salvaqmi kanki,qamman confiakayämuptinqa manam dejaqtsu kanki.+
6 Peru noqallätaqa kurutanömi rikäyäman, manam nunatanötsu,tsëmi nunakunaqa penqapäyäman y markachö täkoqkunapis* despreciayäman.+
7 Rikäramarqa llapanmi noqapita asikuyan,+despreciamarmi peqankunata o umankunata kuyutsiyan y burlakurmi niyan:+
8 “Jehovämanshi confiakun.
¡Mä rasumpa kuyarqa salvatsun y yanapatsun ari!”.+
9 Dios Yaya, qam munaptikim yurikurqä,+qam cuidamaptikim mamäpa mellqaninchöpis kushishqa karqä.
10 Yurikunqä junaqpitam cuidamarqëki,y mamäpa pachanllachöraq këkaptïmi qamqa Diosnïna karqëki.
11 ¿Imanirtan Teyta Dios karuchö këkanki? Imëka problëmakunapa pasanäpaqnam këkä.+
Karullachö kaptikiqa, ¿piraq yanapamanqa?+
12 Chikimaqkunam waqrakoq törunö entëru lädüpa tumapäyäman,+Basanchö kallpasapa törukunanömi entëru lädüpa tumapäyäman.+
13 Animalta wanutsir leon qapareqnömi,*+shiminkunata äyakurkur noqaman shayämun.+
14 Patsaman jichëkushqa yakunömi këkä,tullükunapis qotukashqa cuentam këkan,y shonqüpis abëjapa cëran tsulloqnömi+ ushakëkan.+
15 Mitupita manka tsakeqnömi kallpäpis ushakärin,+shimï tsakiptinmi qallüpis paladarnïman laqakan.+
Wanunäpaqmi sepultüraman jitarkamanki.+
16 Chikimaqkunaqa kanikoq allqunömi entëru lädüpa tumapäyäman,+juk grüpu pureq asaltantikunanömi entëru lädüman churakäyämun.+
Mallaqashqa leonnömi makïtapis chakïtapis rachir ushayämun.+
17 Tullükunapis rikakäramushqam,+chikimaqkunaqa alläpam rikaräyäman.
18 Wakin röpäkunatam rakipänakuyan,y röpäkunata apakuyänampaqmi sortiayan.+
19 ¿Imanirtan Teyta Jehovä karuchö këkanki?+
Qammi kallpayoqta tikratsimanki, jinan höra shamur yanapëkamë.+
20 Espädawan mana wanutsiyämänampaq salvëkamë.
Chikimaqkunaqa kanikoq allqunömi kayan, pëkunapita salvëkamë.+
21 Leonpa shimimpitanö+ y waqrakoq törupa waqrampitanö defendïkallämë,qayakamunqäta wiyëkallämë y salvëkallämë.
22 Jutikipitam wawqïkunata willashaq,+y sirwishoqnikikuna juntakäyanqanchömi alabashqëki.+
23 ¡Qamkuna Teyta Diosta respetaqkuna,* Jehoväta alabëkuyë!
¡Qamkuna Jacobpa kastankuna, Teyta Diosta alabëkuyë!+
¡Qamkuna Israelpa kastankuna, Teyta Diosta respetayë!
24 Teyta Diosqa sufrikaqkunata manam despreciashqatsu ni dejashqatsu,+tsëpa rantinqa yanapashqam+y rogakur qayakuyaptimpis wiyashqam.+
25 Mëtsika sirwishoqnikikuna juntakäyanqanchömi alabashqëki,+y äninqaqtapis respetashoqnikikuna* rikëkäyaptinmi cumplishaq.
26 Humildi nunakunam pacha junta mikuyanqa,+Teyta Jehoväta sirweqkunam alabayanqa,+y mana wanushpam kawakuyanqa.
27 Entëru patsachö nunakunam, Teyta Jehoväta yarpäyanqa y sirwir qallayanqa.
Mëtsë nacionpita familiakunam Teyta Diosta adorayanqa.+
28 Jehovä Diosllam gobernantiqa,+pëllam mëtsë nacionchöpis gobernan.
29 Tsëmi patsachö rïcu nunakuna mikur qonqurikuyanqa,sepultüraman* llapan ëwaqkunam pëpa puntanman qonqurikuyanqa.
Y manam mëqampis maslla kawanampaq ima rurëta puëdinqatsu.
30 Noqapa kastäkunam Teyta Diosta sirwiyanqa,y pëkunapa kastankunatam Teyta Jehoväpita parlapäyanqa.
31 Shamurmi Teyta Dios ruranqankunata willakuyanqa.
Qepa yureqkunatam pë llapan ruranqanta willayanqa.
Nötakuna
^ Tsënö nirqa, capazchi tocayanqan tönupaq parlëkan.
^ Kënöpis niyanmi: täraqkunapis; päraqkunapis.
^ Kënöpis niyanmi: qayaraqnömi.
^ Hebreu idiömachöqa “mantsaqkuna” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “mantsashoqnikikuna” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “allpaman” ninmi.
