Salmus 88:1-18
Cancion. Corëpa kastankuna+ qellqayanqan. Cantaqkunata dirigeqpaq. Llakishqa cantayänampaq. Cambianakuypa cantayanqan. Ezrahïta Heman+ qellqanqan. Maskil.*
88 Teyta Jehovä, qamllam imëpis salvamanki,+yanapëkamänëkipaqmi paqaspapis junaqpapis qayakamü.+
2 Teyta Dios, qammanmi mañakëkämü,+rogakamuptï wiyëkallämë.+
3 Imëka mana allikunam pasaman,+wanuypis o wañuypis janächönam këkan.+
4 Nunakunapis wanushqatanönam o wañushqatanönam rikäyäman,+kallpannaq nunanömi këkä.+
5 Manana yarpanqëki y manana yanapanqëki nunanömi kallä.
Ayakuna rurinchö jitarëkaqnö y sepultüra rurinchö jitarëkaqnömi sientikü.
6 Ampeq o tsakaq* mëtsikan hondu uchkumanmi jitarkamarqunki.
7 Lasaq qepitanö y lamarpa ölankuna nitirkamaqtanömi cölerëkita sientï.+ (Sëlah).
8 Qam munaptikim reqimaqkunapis noqapita karupäyashqa.+
Manam rikämëtapis munayantsu.
Manam ni mëpa qeshpir ëwakuyta puëdïtsu, prësurëkaqnömi sientikü.
9 Alläpa sufrir waqaptïmi nawïpis rikannatsu.+
Patsa waranqampita tardiyanqanyaqmi qamman rogakamü Teyta Jehovä,+makïta pallarkurmi* qayakamü.
10 Sepultürachöqa, ¿ruranqëki milagrukunata rikäyanqatsuraq?
Wanushqana këkarqa, ¿sharkayämunqatsuraq alabayäshunëkipaq?+ (Sëlah).
11 Pamparäyanqanchöqa, ¿alläpa kuyakoq kanqëkita parlayanqatsuraq?
Ushakäyanqan sitiuchöqa, ¿parlanqëkita cumpleq kanqëkita willakuyanqatsuraq?
12 Ampichönö o tsakëchönö* këkarqa, ¿imëka espantëpaq ruranqëki cösaskunata rikäyanqatsuraq?
Wanukurnin llapantapis qonqashqana këkarqa, ¿justicia ruranqëkita musyayanqatsuraq?+
13 Peru Teyta Jehovä yanapamänëkipaqmi qayakëkämü,+cada patsa waraptinmi qamman mañakamü.+
14 Teyta Jehovä, ¿imanirtan dejaramarqunki?+
¿Imanirtan rikämëtapis munankinatsu?+
15 Jövin kanqäpitam alläpa sufrirqö y cäsim wanurqöpis.+
Dejamaptikim alläpa sufrirqö,alläpa mantsakashqam këkä.
16 Cölerashqa karmi alläpa sufrikätsimanki.+
Imëkata ruranqëkiwanmi alläpa mantsakätsimanki,ushakänäpaq kaqtam pensä.
17 Castigamänëkipaq imëkata ruranqëkiqa entëru lädüpa shamoq yakunömi,entëru lädüpa yëkamoq yakunömi.
18 Qammi amïgükunapita y marka mayïkunapita rakimarqunki,+kananqa japallämi ampichö o tsakëchö* këkä.
Nötakuna
^ Tsë palabra ima ninan kanqanqa manam musyëllatsu. Rikäri “Bibliachö palabrakunata entiendinapaq” neqta.
^ Kënöpis niyanmi: Tutapaq.
^ Kënöpis niyanmi: joqarkurmi.
^ Kënöpis niyanmi: Tutapëchönö.
^ Kënöpis niyanmi: tutapëchö.
