¿YARPANKIKU Diospa juk angelnin imanir Satanas Diabluman tikranqanta?... Tsë angelqa pëta adorayänanta munarmi Diospa contran churakarqan. ¿Mas angelkunapis Satanasman qaqäyarqanku?... Awmi. Bibliachömi nin pëkunaqa Satanaspa ‘angelninkuna’ o demoniukuna kayanqanta (Apocalipsis 12:9).

¿Tsë mana alli angelkunaqa Diosman creiyanku?... Awmi. Bibliachömi willakun ‘demoniukunapis Diosman creiyanqanta’ (Santiägu 2:19). Peru mana allikunata rurayanqampita Diosnintsik castiganampaq kaqta musyarmi, kananqa mantsakashqa këkäyan. ¿Ima mana allikunatataq rurayashqa?...

Bibliachömi willakun tsë mana alli angelkunaqa, ciëluchö kayänampa rantin Patsaman shamurnin nunanö kawayanqanta. Tsëtaqa rurayarqan Patsachö shumaqllan warmikunawan oqllanakuyta munarmi (Genesis 6:1, 2; Jüdas 6). ¿Oqllanakuy ima kanqanta musyankiku?...

Juk ollqu y juk warmiqa kuyanakurmi oqllanakuyan. Oqllanakuyaptinmi warmiqa qeshyaq quedarinman. Diosnintsikqa munan casädu kaqkunalla oqllanakuyänantam. Tsënöpam wamrankuna yuriptinqa, ishkankuna cuidayanqa. Peru angelkunataqa manam warmiwan oqllanakuyänampaqtsu Diosnintsik kamarqan.

Tsë mana alli angelkunaqa nunaman tikrarmi warmikunawan oqllanakuyarqan. Tsë warmikunachömi wamrankuna yurirqan, y jatunyarkurqa jatusaq nunakunam kayarqan. Pëkunaqa alläpa mana allim kayarqan y nunakunatapis alläpam sufritsiyaq. Tsëmi pëkunata y mana allita ruraq nunakunata ushakätsinampaq, Diluviu kanampaq Diosnintsik permitirqan. Peru Noëtaqa juk arcata o jatun barcuta ruranampaqmi mandarqan, tsënöpa alli kaqta ruraq nunakuna salvakuyänampaq. Alli Yachatsikoq Jesusqa Diluviuchö pasanqanta mana qonqanapaqmi nirqan (Genesis 6:3, 4, 13, 14; Lücas 17:26, 27).

Diluviu qallëkuptinqa, ¿imatataq mana alli angelkuna rurayarqan?... Pëkunaqa nunanö këta dejarmi ciëluta kutikuyarqan. Peru manam Diosnintsikpa angelninkuna këta puëdiyarqannatsu, tsëmi Satanaspa angelninkunana o demoniuna kayarqan. Y tsurinkunawanqa, ¿imataq pasarqan?... Diluviuchömi mana cäsukoq nunakunawan ushakäyarqan.

Diluviu pasariptinqa, manam Diosnintsik permitirqannatsu demoniukuna nunaman tikrayänanta. Demoniukunataqa manam rikëta puëdintsiktsu. Tsënö kaptimpis, nunakuna mana allikunata rurayänampaqmi imëkata rurëkäyan. Patsaman jitarkayämushqa kayaptinmi, kananqa imëpitapis masraq mana allikunata rurar këkäyan.

¿Musyankiku demoniukunata imanir rikëta mana puëdinqantsikta?... Pëkunaqa espïritum kayan, tsëmi rikëta puëdintsiktsu. Tsënö kaptimpis, demoniukunaqa kanmi. Bibliachömi willakun, Satanaswan demoniukunaqa ‘entëru patsachö nunakunata engañëkäyanqanta’ (Apocalipsis 12:9, 12).

Diabluwan demoniukunaqa, ¿noqantsiktapis engañamënintsikta puëdiyanmanku?... Awmi, mana cuidakushqaqa noqantsiktapis engañaramashwanmi. Tsënö kaptimpis, pëkunataqa manam mantsanantsiktsu. Alli Yachatsikoq Jesusmi kënö nirqan: ‘Diabluqa manam dominamëta puëdintsu’. Diosnintsikwan amïgu kashqaqa, pëmi Diablupita y demoniukunapita cuidamäshun (Juan 14:30).

Demoniukuna imakunata ruranantsikta munayanqantaqa musyanantsikmi. Këllaman pensari: demoniukuna Patsaman shamurqa, ¿ima mana allikunatataq rurayarqan?... Diluviu manaraq kaptinmi warmikunawan oqllanakur kakuyarqan, peru Diosnintsikqa manam warmikunawan oqllanakuyänampaqtsu kamarqan. Kanan witsampis, oqllanakuy asuntupaq Diosnintsik mandakunqanta mana cäsukuyaptinmi demoniukunaqa alläpa kushikuyan. ¿Yarpankiku? ¿Pikunallatan oqllanakuyta puëdiyan?... Awmi, casädu kaqkunallam.

Kanan witsan jövinkuna y shipashkunaqa oqllanakurmi kakuyan, peru tsëqa manam allitsu. Bibliachöqa clärum willakun ollqupa partinqa pene kanqanta y warmipa partinna vulva kanqanta (Levïticu 15:1-3). Jehoväqa tsëkunata kamarqan casädu kaqkunalla oqllanakur kushishqa kayänampaqmi. Jehovä michäkunqanta nunakuna rurayaptinqa, demoniukunaqa alläpam kushikuyan. Jukqa kanman, ollqu wamra y warmi wamra partinkunata yatapänakur kayaptinmi. Noqantsikqa manam demoniukunata kushitsita munantsiktsu, ¿aw?...

Jehoväta mana gustanqampitaqa, ¿ima masraq demoniukunata gustan? ¿Musyankiku?... Nunakuna maqanakuyanqanmi (Salmus 11:5). Lïsu nunakunaqa wakinkunatam mana allipa tratayan y sufritsiyan. Yarpë, tsëtam demoniukunapa jatusaq tsurinkunapis rurayarqan.

Demoniukunaqa nunakunatam mantsakätsita gustayan. Tsëmi höraqa wanushqa nuna tukur puriyan o parlayan, tsënöpa wanushqakuna kawar sïguiyanqanta o pëkunawan parlëta puëdiyanqanta nunakuna creiyänampaq. Tsëta rikar o wiyarmi mëtsikaq nunakunaqa alma kanqanman creiyan.

Satanaswan demoniukuna mana engañamänapaqqa mäkoq mäkoqllam këkänantsik. Bibliachömi cläru willakun ‘Satanasqa alli angel tukur kanqanta y sirweqninkunapis allita ruraq tukuyanqanta’ (2 Corintius 11:14, 15). Tsënö kaptimpis, demoniukunaqa mana allikunatam rurayan. ¿Imatataq rurayan pëkunanö kanantsikta munar?

¿Mëchötan nunakunaqa yachakuyan maqanakuypaq, lluta oqllanakuypaq, mana alli espïritukunapaq y almakunapaq?... Tsëkunataqa yachakuyan televisionchö, videujuëgukunachö, Internetchö y cuentukunachömi. Tsëkunaqa, ¿pitataq kushitsin? ¿Diostaku o Diablutawan demoniukunataku? ¿Imatan ninki?...

¿Pikunatan munayan mana allikunata wiyanantsikta y rikänantsikta?... Satanaswan demoniukunam. Tsëqa, ¿imatataq ruranantsik?... Jehoväta sirwinapaq yanapamanqantsiktam leyinantsik, wiyanantsik y rikänantsik. Tsëkunaqa, ¿imakunaraq kanman?...

Allikunata rurarqa, manam demoniukunata mantsanantsiktsu. Yarpäshun, Jesusqa demoniukunapitapis mas puëdeqmi. Juk kutichömi demoniukunaqa mantsakarnin Jesusta kënö tapuyarqan: “¿Ushakätsiyämaqnïku shamurqunki?” (Marcus 1:24). Pëkunata Jesus ushakätsiptinqa, ¿manatsuraq kushikushun?... Jesuswan y Teytan Jehoväwan amïgu kashqaqa, Jesusmi tsë tiempuyaq demoniukunapita cuidamäshun.