Bibliam yanapashqa jukläyana kawakuyänampaq

¿IMATAN juk nunata yanaparqan apostëta y suwakuyta dejanampaq y vïdanta cambianampaq? Kikin willakunqanta rikärishun.

“Cawallukuna gananakur cörreqta rikëmi gustamaq” (RICHARD STEWART)

YURIKUNQAN WATA: 1965

NACIONNIN: JAMAICA

MAS REQINAPAQ: APOSTËMI GUSTAQ Y LADRONMI KARQAN

PUNTA KANQÄ: Jamaica nacionchö mëtsika waktsa nunakuna kawayanqan Kingston markachömi winarqä. Tsëchöqa mana trabäju kaptinmi mëtsika delincuentikuna karqan. Tsëmi nunakunaqa alläpa mantsakur kawayaq. Cäsi cada junaqmi illapanakuyanqanta wiyayaq kayä.

Mamänïqa noqata y menor wawqïtawan panïta manteniyämänampaqmi alläpa trabajaq, y alli escuëlakunachö estudiayänätam munaq. Peru noqataqa cawallukuna cörriyanqanta rikëmi gustamaq, manam escuëlata ëwëtsu. Cawallukuna cörreqta rikaq ëwanäpaqmi höraqa escuëlatapis ëwaqtsu kä. Y cawallukunatapis juk ishkëllataqa montarqäran.

Tsëpita ichik tiempullatam apostar qallëkurqä y jukwan jukwanmi warmikunawan yarqurqä. Marihuäna niyanqantam fumaq kä. Tsëkunata ruranäpaq qellëta wanarmi suwakur qallëkurqan, y atska armäkunam karqan. ¡Atskaq nunakunata asaltashqa karpis antis manam pitapis wanutsirqätsu!

Tsëpitaqa prësuyämaptinmi carcelchö karqä. Carcelpita yarqurirqa unë ruranqäta rurarmi sïguirqä, y mas peor-ran portakurqä. Inocenti tukurpis, pensanqällachömi tsarakoq kä, tsë höram imatapis cölerakoq kä, mana llakipäkoqmi karqä y kikïllamanmi pensaq kä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ? Tsënö penqakuypaq kawëkaptïmi mamänïqa Bibliapita yachakur Testïgu tikrarqan. Imanö kanqampita jukläyana kanqanta rikarmi alläpa espantakurqä. Imanir cambianqanta musyëta munarmi Testïgukunawan Bibliapita parlar qallëkurqä.

Cuentatam qokurqä wakin religionkunanö mana yachatsikuyanqanta y llapan niyanqampis Bibliachö këkanqanta. Punta cristiänukuna rurayanqannölla Bibliapita wayin wayin yachatsikoqtaqa pëkunallatam rikarqä (Mateu 28:19; Hëchus 20:20). Kuyanakuyanqanta rikarmi alli kaq religion kayanqanta següru karqä (Juan 13:35).

Bibliapita yachakurmi pasëpa cambianäpaq kaqta cuenta qokurqä. Jehovätaqa manam gustantsu oqllanakur melanëpaqkunata rurayanqan, tsëmi pëta kushitsita munarqa cuerpüta mana limpiu tikratseq rurëkunata dejanä karqan (2 Corintius 7:1; Hebrëus 13:4). Jehovä sentimientuyoq kanqanta y ruranqantsikwan kushitsita o llakitsita puëdinqantsikta yachakunqämi shonqüyaq chärirqan (Proverbius 27:11). Tsëmi marihuäna niyanqanta y armakunata mana katsinäpaq decidirqä, y jukläyana portakunapaqmi kallpachakurqä. Peru warmikunata y apostëta dejëqa manam fäciltsu karqan.

Qallananllachöqa manam munarqätsu Testïgukunawan Bibliapita yachakuykanqäta amïgükuna musyayänanta. Tsënö kaptimpis, Mateu 10:33 textuchö Jesus ninqanmi pensanqäta cambianäpaq yanapamarqan. Pëmi kënö nirqan: “Pï nunapis nunakunapa puntanchö negamaptinqa, noqapis ciëluchö këkaq Teytäpa puntanchömi pëta negashaq”. Tsë höram amïgukunata willarqä Testïgukunawan Bibliapita yachakuykanqäta. Cristiänu këta puëdinqäta mana creirmi ima nimëtapis puëdiyarqantsu. Tsënö kaptimpis, imanö kanqäta cambianäpaq decidïdu këkanqätam nirqä.

¿IMAKUNACHÖTAN YANAPAMASHQA? Bibliachö ninqannö kawanäpaq kallpachakunqäta rikarmi mamänïqa alläpa kushikurqan. Manam “imataraq wamrä rurëkan” nirnatsu noqapaq yarpachakun. Ishkätapis Jehoväta kuyayanqäpita parlëmi alläpa gustayäman. Imanö kanqäta yarparqa, Teyta Dios yanapamaptin imëkata cambianqäman pensarmi alläpa espantakü. Kananqa oqllanakur melanëpaqkunata rurëta ni imëkayoq këtapis manam munänatsu.

Bibliapita mana yachakurqa capazchi carcelchö o wanushqana këkäman karqan. Tsënö kaptimpis, Bibliapita yachakushqa karmi familiäwan kushishqa kawakü. Warmïqa llapan ruranqächömi yanapaman y warmi tsurïpis alläpa respetakoqmi, y kimäkunam Jehoväta kushishqa sirwiyä. Bibliapita yachatsiyämanqantaqa manam imanöpis agradecikuyta puëdïtsu. Tsëmi mëchö këkarpis y imata rurëkarpis nunakunata Bibliapita yachatsinäpaq kallpachakü. Sirweqnin kanäta Jehovä permitimanqampitam alläpa agradecikü, peru masqa agradecikü alläpa alli karnin pëman pushamanqampitam.

[Willakuy]

“Jehovä sentimientuyoq kanqanta y ruranqantsikwan kushitsita o llakitsita puëdinqantsikta yachakunqämi shonqüyaq chärirqan”

[Fötu]

Warmïwan y warmi tsurïwanmi këkäyä

[Fötu]

Imanö kanqampita mamänï jukläyana kanqanta rikarmi alläpa espantakurqä