¿Imanötan kayan alli amïgukunaqa?
8 YACHATSIKUY
¿Imanötan kayan alli amïgukunaqa?
Brittanym nin: “Imapitapis cölerashqa karqa, pillapis shumaq wiyaramänantam munä. Llakishqa këkaptï pillapis ‘ama yarpachakuytsu’ nimänantam munä. Y kushishqa këkanqätaqa pillatapis willëtam munä. Noqataqa imëpis amïguyoq këmi gustaman”.
WAKINQA niyan, wamrakunaqa juk wamrakunawan pukllëta wanayanqantam, y jövin kaqkunana amïguyoq këta wanayanqanta. Peru piwampis juntu pukllëqa y amïgu këqa, ¿imachötan jukläya?
Wamrapura pukllaqkunaqa pukllayanqan hörallam juntaräriyan.
Juk amïguqa imëkachöpis mas alliyänapaqmi yanapamantsik.
Bibliachömi kënö nin: “Rasumpa amïgu karqa, imëpis kuyakoqllam këkanqa, y desgraciakunapa pasayanqan hörapis kuyakoq wawqinnömi dejantsu” (Proverbius 17:17). Tsëmi jövinkuna amïguyoq kayanqanqa, wamrakuna wamra mayinkunawan pukllayänampaq juntakäyanqanwan igualantsu.
Rasumpa kaqchöqa winanqëkimannömi amïgukunata wananki, peru pëkunaqa kayänan...
1) ... allita ruraq kaqkuna.
2) ... Bibliachö ninqanta cäsukoqkuna.
3) ... imëpis allita ruranëkipaq yanapashoqnikikuna.
Tsëqa, këchö ninqannöku amïguykikuna kayan. Imanir tsënö kayänampaq kaqta kimallata rikärishun.
Punta kaq: Allita ruraq kaqkuna
Këta musyë: amïguyki kayanqanta nirpis manam llapantsu alli amïgu kayan. Bibliachömi kënö consejakun: “Wakinkunaqa amïgu këkarpis mana allikunamanmi chätsinakuyan” (Proverbius 18:24). Kë tapukuykunaman pensë: ¿imëllapis mana confiakuypaq “amïguyki” kashqaku? ¿Qampaq mana kaqta nirnin wasëki rimashqaku? Tsënö amïgukunaqa manam allitsu kayan. a Wallkalla karpis amïguntsikkunaqa confiakuypaqmi kayänan.
Këta rurë: imëpis allita rurayänampaq kallpachakoq amïgukunata akrë.
17 watayoq Yvettemi nin: “Amïgä Fiönapaqqa llapankunam allita parlayan. Noqapaqpis tsënö alli parlayänantam munä, tsëmi pënö këta munä”.
Këkunata rurë:
1. Leyi Gälatas 5:22, 23.
2. Këman pensë: ¿amïguykikunaqa imata rurayanqanchöpis ‘santu espïritu pushanantaku’ dejayan?
3. Confiakunqëki amïguykikunapa jutinta qellqë, y lädunman qellqë imanö kanqan mas gustashunqëkita.
Jutin
․․․․․
Imanö kanqan
․․․․․
Consëju: mëqan amïguykichöpis mana allikunallata rikarqa, jukkunata ashi amïguykikuna kayänampaq.
Ishkë kaq: Bibliachö ninqanta cäsukoqkuna
Këta musyë: imëkanöpa juk amïguyoq këta munarqa, mana allim akrarinkiman. Kë textuchö ninqanta ama qonqëtsu: “Juiciunnaq nunakunawan juntakaqqa mana allichömi ushanqa” (Proverbius 13:20). Kë textuchö “juiciunnaq” nirqa, manam escuëlanchö mana alli nötayoq o mana alläpa yachaq kanqantatsu rikätsikun, sinöqa imatapis lluta ruranqanta y mana cäsukoq kanqantam rikätsikun. Y qamqa manachi tsënö amïgukunayoq këta munankitsu, ¿aw?
Këta rurë: alliraq rikë alli amïgukunata akranëkipaq, ama llutallaqa akrëtsu (Salmus 26:4). Peru tsënö nirqa manam juk ishkë amïgukunayoqlla kanëkipaqtsu parlëkantsik, sinöqa “allita ruraq nunakuna, mana allita ruraqkunapita” imachö jukläya kayanqanta, y “Teyta Diosta sirweqkuna, pëta mana sirweqkunapita” imachö jukläya kayanqanta alliraq rikänëkipaqmi, tsënöpa alli amïgukunata akranëkipaq (Malaquïas 3:18).
13 watayoq Christophermi nin: “Papänïkuna alli amïguyoq kanäpaq yanapayämanqampitaqa kushikümi, amïgükunaqa kallpachakuyanmi Jehoväta alli sirwiyänampaq”.
Kë tapukuykunata contestë:
¿Mantsankiku amïguykikuna mana allita ruranëkipaq obligayäshunëkita?
□ Awmi
□ Manam
¿Mantsankiku amïguykikunata papänikikuna reqiyänanta?
□ Awmi
□ Manam
Consëju: “Awmi” neqta marcashqa karqa, Dios munanqannö kawaq cristiänukunapita amïguykikuna kayänampaq ashi.
Kimaq kaq: Imëpis allita ruranëkipaq yanapashoqnikikuna
Këta musyë: Bibliachömi kënö nin: “Mana alli nunakunawan juntakuyqa, alli costumbrikunatam oqratsikun” (1 Corintius 15:33). Tsëmi pasarqan Lauren jutiyoq shipashta, pëmi kënö nin: “Noqaqa escuëlapita shipashkuna amïgäkuna kayänantam munarqä. Peru tsëpaqqa llapan niyämanqantam ruranä karqan. Y japallä sientikurmi chaskiyämananta munar, pëkunanö portakur qallëkurqä”. Lauren jutiyoq shipash ruranqannö rurarqa, imëka ajedrezta pukllachö peonkunanömi kanki. Imanömi tsë peonkunata munayanqanman kuyutsiyan, tsënömi qamtapis munayanqanta ruratsiyäshunki. ¿Rasumpaku tsënö këta munanki?
Këta rurë: imanö kanqëkita cambianëkipaq, pëkunanölla pensanëkipaq o mana alli portakunëkipaq obligayäshuptikiqa pëkunapita witikuri. Capaz tsëta rurarqa atska amïguyoqnatsu kanki, peru kushishqam kanki. Y mas alli amïgukunatam tarinki, pëkunaqa mas alli kanëkipaqmi yanapayäshunki (Romänus 12:2).
21 watayoq Jasonmi nin: “Juk alli amïgüpa jutinqa Clintmi. Pëqa imatapis alli ruraq y kuyakoqmi, tsëmi llakishqa këkaptïpis yanapaman”.
Kë tapukuykunata contestë:
¿Amïguykikuna alli rikäyäshunëkita munarku jukläyana vistikunki, portakunki y parlanki?
□ Awmi
□ Manam
¿Amïguykikuna ëwayaptinllaku qampis mana allikunata rurayanqan sitiukunaman ëwanki?
□ Awmi
□ Manam
Consëju: “Awmi” nirnin marcashqa karqa, papänikikunata o mas mayor kaqkunata niri alli amïgukunata akrar yanapayäshunëkipaq. Y Jehoväpa testïgun karqa congregacionnikichö juk anciänuwan parlari.
JÖVINKUNA MUSYËTA MUNAYANQAN (2 KAQ) LIBRUPA 9 KAQ YACHATSIKUYNINCHÖMI MAS YACHAKUNKI
¿Pillapis mana allita ruranëkipaq nishurqunkiku?, o ¿mana alli kanqanta musyëkar imatapis rurëta munarqunkiku?
[Nöta]
a Höraqa llapantsikmi imallatapis mana allita rurarintsik (Romänus 3:23). Amïguntsikkunaqa imallachöpis llakiratsimashwanmi, peru shonqupita perdonëkunapaq nimashqaqa, yarpänantsikmi Bibliachö kënö ninqanta: “Kuyakoq nunaqa, wakinkunata perdonanampaqmi imëpis listu këkan” (1 Pëdru 4:8).
BIBLIACHÖ YACHAKUNQANTSIK
“Alli amïgukunaqa, wawqintsikpitapis mas kuyakoqmi kayan” (Proverbius 18:24).
KËTA RURË
Dios munanqannö portakunëkipaq kallpachakuy. Tsëta ruraptikiqa alli amïgukunam qamman witiyämunqa.
¿MUSYARQËKIKU?
Teyta Dios llapan nunakunata igualpa rikarpis, amïgun kayänampaqqa alli rikëkurmi akran (Salmus 15:1-5).
¡KËKUNATA RURË!
¿Imataraq ruräman alli amïguyoq kanäpaq? ․․․․․
Maslla reqita munanqä mayorna kaqkunapa jutinkuna: ․․․․․
Amïgukunayoq këpaq, ¿imatataq papänïta o mamänïta tapuyta munä? ․․․․․
QAMQA, ¿IMATATAQ PENSANKI KË TAPUKUYKUNAPAQ?
● ¿Amïguyki imanö kanqantan mas gustashunki? Willakaramuy.
● Alli amïgu kanëkipaqqa, ¿imata rurartan mas kallpachakunkiman?
[Willakuy]
Carlusmi nin: “Papänïkunaqa wakin kaq amïgükunawan manana juntakunapaqmi niyämarqan. Qallananllachöqa manam tsëta rurëta munarqätsu, tsë amïgükunalla entiendiyämanqanta pensarnin. Peru papänïkuna niyämanqan alli kanqantam cuentata qokurqä, tsëmi yanapamarqan mas alli amïgukunata tarinäpaq”.
[Recuadru]
Këkunata ruranqëkipis yanapashunkim
Papänikikunawan parlë. Tapuy, jövin kayanqan witsan amïgunkuna imanö kayanqanta. ¿Imëllapis amïgunkunata akrayanqanchöqa pantayarqanku? ¿Imanir? Y tapuy problëmakunaman mana chänëkipaq imakunata ruranëkipaq kaqta.
Papänikikunata reqitsi amïguykikunata. Reqitsita mana munarqa, pensari imanir mana munanqëkita. ¿Capazchi musyanki papänikikunapa rikënimpaqqa tsë amïguyki mana alli kanqanta? Tsëqa masmi kallpachakunëki alli amïgukunata tarinëkipaq.
Amïguykikuna parlapäyäshuptiki shumaq wiyë. Parlapäyäshunqëkita cuentachö katsi, y pëkunapaq yarpachakuy (Filipensis 2:4).
Alli entiendikoq y perdonakoq kë. Amïguykikuna imëpis mana pantayänampaq kaqtaqa ama pensëtsu. Santiägu 3:2 nin: “Llapantsikmi mëtsika kuti pantantsik”.
Ama kikikillamanqa pensëtsu. Ama amïguykikuna qampa amiguykilla kanantaqa munëtsu. Kuyakoq amïguykikunaqa wananqëki höram läduykichö këkäyanqa yanapayäshunëkipaq (Eclesiastes 4:9, 10).
[Fötu]
Amïguykikuna llapan niyäshunqëkita rurar y pëkunanö portakurqa ajedrezta munayanqanman kuyutsiyanqan peonnömi kanki.
Capaz këkunapis gustashunki
MAYORNA Y WAMRALLARAQ JÖVINKUNAPAQ
Jövinkuna musyëta munayanqan
Këchöqa jövinkunam imëkata yachakuyta puëdiyan. Këchöqa parlan piwampis këpaq, yanasa ashipaq, teyta mamapaq, estudiupaq y maskunapaqmi.
