Amigoqa kayan kuyanakurninmi. Tseno kaqmi Jehovapita mas yachakurnenqa, masmi kuyanki, pë nenqantapis masmi rureta munanki. Keta käyirmi Jesuspa discipulon keta munanki (Mateo 28:19). Qampis kushishqa wiñeypaq Diospa amigon kankimanmi, Jehovapa testigonkunaman ewarnenqa, shumaq familiatam tarinki pekunachoqa. ¿Imataraq rurankiman pekunawan kanekipaq?

Rikaratsi Diosta kuyanqekita, leyninta wiyakurnin. “Kemi kë Diosta kuyeqa: leyninta wiyanantsik, tse leyninqa manam utitsikuntsu.” (1 Juan 5:3.)

Yachakonqekino rure. Keta käyinapaqmi Jesusqa parlarqan ishkaq nunapaq. Huk yachaq nunam wayin ruranaq qaqa hanancho, huknin upa nunanam wayin ruranaq aqusha hananllacho. Wamayëpaq seqincha tamya chëkurnam, aqushallacho rurashqa wayita, huchurerqan, qaqa hanancho rurashqa wayitaqa, manam huchurqantsu. Tsenam Jesusqa nerqan, llapan yachatsikonqata wiyakurnenqa, kayanqa tse qaqa hanancho wayi ruraq nunanomi. Hina nerqanmi, yachatsikonqata musyëkar mana wiyaqkunaqa, tse aqusha hanancho wayi ruraq upa nunanomi kayan. ¿Meqan nunanöraq keta munankiman? (Mateo 7:24-27.)

 Diosman dedicaki. Tsetaqa ruranki Jehovata mañakïnikichomi, Qampa voluntadnikillatam wiñeypaq rureta muna nirnin. Diospa voluntadninta rurarqa, rikarätsishun Jesucristopa discipulon kanqantsiktam (Mateo 11:29).

Bautizakuye. “Bautizaki, hutsekita paqe, pepa shutinta chaskirnin.” (Hechos 22:16.)

Diospa voluntadninta rure llapan kallpekiwan. “Imata rurëkarpis uryaye llapan kawënikikunawan Jehovapaqno, ama nunapaqnoqa.” (Colosenses 3:23.)