Jehovaqa manam haqirenqatsu, mana alli nunakuna Paraisonta ushakätsiyananta. Paraisonchoqa amigonkunallam tärayanqa. ¿Imaraq pasanqa mana alli nunakunata? Keta musyarinapaq, yarpärishun Noepa kawëninta. Noé kawanqanqa, atska waranqa watanam. Pëqa allapa alli nunam karqan, llapan kallpanwan Jehová munanqanta rureta tïrarqan imepis. Wakin Patsacho taraq nunakunaqa mana allillatam rurayarqan. Tsemi Jehová nerqan Noeta, kë Patsamanmi apamushaq wamayëpaq tamyata, llapan mana alli nunakuna ushakayänampaq. Manaraq tse wamayëpaq tamya, Diluvio nenqan chaptinmi, Jehová nerqan huk arcata ruranampaq, mana familianwan wanuyänampaq (Génesis 6:9-18).

Noemi familianwan arcata rurayarqan. Noeqa nunakunata willarqanmi Diluvio shamunanta, tseno willakïkaptimpis manam ni pi wiyakorqantsu. Mana allikunata rurarllam kakuyarqan. Noé arcata rurarirninmi, animalkunata qeykorqan, tsepeqnam kikin yëkorqan familianwan. Tsenam Jehová tamyëkatserqan wamayëpaq. Tamyëkorqan chusku chunka hunaq, chusku chunka paqas, yakupis Patsaman limpu huntanqanyaq (Génesis 7:7-12).

 Mana alli nunakunaqa wanuyarqanmi, Noellam familianwan salvakorqan. Tselaya tamyëkaptimpis Jehovami tsapëkorqan Noeta familiantawan, tsepeqnam aparqan chipyëkaq Patsaman (Génesis 7:22, 23). Jehovaqa yapemi ushakätsimonqa mana wiyakoqkunata, ninmi Bibliaqa. Alli nunakunaqa manam ushakäyanqatsu. Wiñeypaqmi kawayanqa, kë Patsa Paraisoman tikrariptin (2 Pedro 2:5, 6, 9).

Kanan nunakunapis mana allikunallatam rurëkayan. Kë Patsaqa tinku sasa kawëyoqmi kakikan. Jehovaqa ninmi Testigonkunata, kutipëkuryan nunakunata willapayänampaq, tseno willapëkayaptimpis wakinkunaqa manam wiyakita munayantsu. Manam haqita munayantsu mana alli rurëninkunata, kikinkunapaq Diosnintsik willapëkaptimpis. ¿Imananqaraq Diosnintsik mana wiyakoqkunata? ¿Imellapis alliyäyanqatsuraq? Wakinkunaqa manachi imepis alliyäyanqatsu. Chëkamunnam mana alli nunakuna wiñeypaq ushakäyanan hunaq (Salmo 92:7).

Manam Patsaqa ushakanqatsu, kë Patsallam paraíso kanqa. Wiñeypam kawayanqa, Diospa amigon keman chaqkunaqa, kë Patsa Paraisoman tikrariptin (Salmo 37:29).