9 KAQ YACHATSIKÏ
Israel nación reyta mañakun
Israelpa punta reynin Saúl, Jehoväta wiyakuntsu. Davidwan conträtota Dios ruran gobernacionnin mana ushakänampaq
SANSÓN wanushqanchömi Samuel jutiyoq juez y profeta Israelchö kawarqan. Wakin nacionkunanö këta munarmi israelïtakuna juk reyta mañakuyarqan. Tsënö mañakuyanqanta Jehová piñakurpis, Saulta rey churanampaqmi Samuelta mandarqan. Saulqa alläpa humildem karqan, pero tsëpitaqa yachaqtukurmi Diosta wiyakurqannatsu. Tsëmi rey kananta Jehová munarqannatsu, y Samuelta nirqan joven Davidta gobernantetanö akranampaq. Pero rey këman chänampaqqa atska watakunaran pasanan karqan.
Saulpa tröpanchö wawqinkuna këkäyanqanmanmi Davidqa watukaq ëwarqan. Chärirnam soldädokuna mantsakashqa këkaqta tarirqan. ¿Imanirtaq mantsakashqa këkäyarqan? Mantsanëpaq jatun filisteo Goliat jutiyoq nuna israelïtakunata qallapar Jehoväpa contran parlaptinmi. Tsëta rikarnam, David wamrallaraq këkarnimpis paqwë piñakurkurqan, y tsë filisteo wanutsinan këkaptimpis peleëta munarqan. Warakanllawan y juk ishkë ruminllawanmi David kima metronö nunawan pelearqan. Goliat rikëkurnam Davidpita burlakurqan, pero Jehoväpa jutinchö peleanampaq kaqtam David nirqan. Juk rumillawanmi ishkiratsirqan. Tsëpitanam kikin Goliatpa espädanta jorqarïkur peqanta roqurirqan. Tsëta rikëkurnam filistëokuna mantsakar safakuyarqan.
Saulqa David ruranqampita alläpam espantakurqan, tsëmi tröpampa mandaqnin churarirqan. Pero guërrakunachö ganaqta rikarnam, chikikur wanïkatsita munarqan. Tsëmi Davidqa salvakunanrëkur qeshpikunan karqan. Atska watakuna qeshpikurlla kawarnimpis Saultaqa respetëkarqanllam. ¿Imanir? Rey kanampaq kikin Jehová churashqanta musyarmi. Y tiempowannam juk guërrachö Saúl wanurirqan. Tsënam Jehová awnikunqannö David rey këman chärirqan.
“Gobiernompa trönontam alli patsätsishaq mana imëpis ushakänampaq.” (2 Samuel 7:13)
Davidqa Jehoväpaq juk templotam rurëta munarqan. Pero Diosqa pë mana ruranampaq kaqtam nirqan, antis tsurin Salomon ruranampaqmi. Tsënö kaptimpis pëpa kastampita reykuna yuriyänampaq kaqtam Jehová awnirqan. Pëpitam Salvamaqnintsik yurinan karqan, y tsë Mirëpaqmi Edén huertachöpis Dios awnikurqan. Pëmi Mesias kanan karqan, pëtam Jehová mana imëpis ushakaq Gobiernonchö Rey kanampaq churanan karqan.
Jehoväta David alläpa agradecirmi örota, qellëta y tukïläya cösaskunata ëllurqan o gorirgan templota shäritsiyänampaq. Jina Dios yanapaptinmi atska salmokunata qellqarqan. Wanukunampaq ichikllana pishikaptinmi, Davidqa Dios yanapanqampita agradecikur kënö nirqan: “Jehoväpa espïritunmi parlanäpaq yanapamarqan, pëmi palabranta shimïman churamurqan” (2 Samuel 23:2).
(1 Samuel; 2 Samuel, 1 Crónicas, Isaías 9:7, Mateo 21:9, Lucas 1:32 y Juan 7:42 textokunapita jorqashqam.)
