¿ALLIPAQTSURAQ Jehoväpa mandädonchö kanqantsik? Musyanapaqqa, Bibliachö willamanqantsikpitam yachakunantsik. ¿Rasumpatsuraq alli kanman? ¿Más alli kawakunapaqtsuraq yanapamäshun? Casi llapan kawënintsikchö yanapamänapaqmi Proverbios librochöqa rey Salomon qellqashqa atska consëjokunata. Wakin kaqllata rikärishun.

Dioswan alli kanapaq. Jehoväwan alli kanapaqqa, alläpam precisan pëman markäkunantsik. Salomonmi kënö nirqan: “Llapan shonqïkiwan Jehoväman markäkï [yärakuy], y kikikipa yachënikillamanqa ama markäkïtsu. Llapan kawënikichö pë munanqanta rurë, tsëqa llapan rurënikitam altsaramunqa” (Proverbios 3:5, 6). ¿Imanötaq rikätsikuntsik Diosman markäkunqantsikta? Pë pushamänata jaqirnin y nimanqantsikta wiyakurninmi. Tsënöpam ciëlochö Teytantsikpa shonqunta kushitsishun y Diablu ulikoq kanqanta rikätsikushun (Proverbios 27:11).

Familiapaqwan amïgokunapaq. Familiakunaqa imëpitapis masmi Diospa yachatsikïninta wanayan. Ollqu kaqtam “joven këkar casakunqëki warmikiwan shonqïki kushikutsun” nin, tsënöpam warminta respetanampaq yarpätsin (Proverbios 5:18-20). Proverbiospa 31 capïtulonchönam warmita nin, nunan y wamrankuna respetayänampaq y kuyayänampaq imata ruranampaqpis. Wamrakunatanam teytanta y mamanta respetayänampaq willapan (Proverbios 6:20). Y consejamantsikmi, alli amïgokuna precisanqanta y wakinkunapita rakikäkurir munënintsikllata ashi mana alli kanqantapis (Proverbios 18:1). Jina mana alliman mana ishkinapaqqa, alli ruraq amïgokunatam akrëta tïranantsik (Proverbios 13:20; 17:17).

Kawënintsikpaq. Proverbios libroqa alli kawakunapaqmi shumaq consëjokunata qomantsik, y yanapamantsikmi mana allikunata mana pensanapaq, mana machanapaq, wakin viciokunaman mana ishkinapaq, kushi kushi kanapaq y alli trabajanapaqpis (Proverbios 6:6; 14:30; 20:1). Jina yachatsimantsikmi Biblia ninqampa contran parlaqkunata wiyë mana alliman chätsimanqantsikta (Proverbios 14:12). Y shonquntsikrëkur ‘kawëta’ tarishqam, shonquntsikta limpiota katsinapaq willapämantsik (Proverbios 4:23).

Biblia consejakunqanqa atska millón nunakunapa kawëninkunatam altsashqa, pëkunaqa musyayanmi Jehová mandakunqanta wiyakï imëkapitapis más alli kanqanta.

(Proverbios libropita jorqashqam.)