¡KË LLAPANTA rikärïkï! ¡Imanö shumaqmi këkan! Rikë qorakunata, montikunata, wëtakunata y llapan animalkunata. ¿Rikankiku kë dibüjochö mëchö elefantekuna y leonkuna këkäyaqta?

¿Mëpitataq yarqaramushqa kë selläma shumaq huerta? Mä rikärishun imanöshi Teyta Dios alistanaq kë Patsata noqantsikpaq.

Puntatash, Teyta Dios ruranaq verde qorakunata patsachö. Tukïläya montikunata ichiktapis y hatuntapis. Këkuna winarnash shumaqyätsiyänaq Patsata. Pero manash tsëllapaqtsu kayänaq. Wakinqa mikunantsik qomänapaqwanshi kayänaq.

Tsëpitanash, Teyta Dios ruranaq pescädokunata yakuchö kawayänampaq y pishqukunata ciëlochö volayänampaq. Ruranaqshi hina allqukunata, mishikunata y cabällokunata; ichisaq y hatusaq animalkunatapis. ¿Täranqëkipa ima animal-llapis kanku? ¡Imanö allim karqan Teyta Dios noqantsikpaq kë llapanta rurëkamunampaq!

Tsëpitanash Patsapa huk kuchunta akrarïkur selläma shumaqta rurarinaq. Tsë huertapaqqa, Edén nishpash shutin churanaq. Perfectosh kanaq. Llapampis tsëchöqa alläpa shumaqshi kanaq. Tsëshi Teyta Diosqa munanaq llapan Patsa kë shumaq huerta ruranqannö kananta.

Pero kë dibüjota yapë rikärïki. ¿Musyankiku, kë huertachö ima pishenqantaraq rikarqan Teyta Dios? Mä rikärishun.