KË LLAPAN allitam Teyta Dios qomarqontsik. Pëmi Intita ruramushqa hunaqpa aktsïmunampaq y Killata y estrëllakunata ampipa ichikllapis aktsïmunampaq. Y Patsatanam noqantsik kawanapaq.

Pero manam ni Intitatsu, ni Killatatsu, ni estrëllakunatatsu ni Patsatatsu puntata Teyta Dios ruramorqan. Tsëpenqa, ¿imataraq rurarqan puntata? Angelkunatash ninmi Bibliaqa. Imanömi mana Teyta Diostapis rikantsiktsu, tsënömi pëkunatapis mana rikantsiktsu. Ciëlochö pëwan täräyänampaqmi angelkunataqa rurarqan.

Puntatash ruranaq huk angelta. Tsë angelshi Teyta Diospa mayor hapallan Tsurin kanaq, y Papäninwanshi uryanaq. Y llapan ciëlochö y patsachö kaqkunatash rurayänaq. Intita, Killata, estrëllakunata y Patsata rurarshi papäninta yanapanaq.

Tsëpenqa, ¿imanöraq karqan kë Patsa? Puntataqa manash ni pï kë Patsachö täränaqtsu. Hinantin Patsatash yakulla tsaparänaq. Pero Teyta Diosqa munanaq nunakuna Patsachö täräyänantash. Tsënash, noqantsik täränantsikpaq alistar qallëkunaq. ¿Imataraq rurarqan?

Unëqa Patsa ampiränaqllash. Tsënash puntata Intita ruranaq aktsïmunampaq. Tsëtash ruranaq hunaq y ampi kanampaq. Tsëpitanash yaku hanampa patsata rikakaratsimunaq.

Y manash ni ima kanaqtsu kë patsachö. Kë dibüjochö rikanqëkinö. Manash kanaqtsu ni wëtakuna, ni montikuna, ni animalkuna. Ni yakuchö pescädollapis. Tsëshi Teyta Diosqa alläpa uryanaq alistapakurnin animalkunapis y nunakunapis alli Patsachö kawayänampaq.