RIKË këchö pasëkanqanta. Adán y Ëvatam qarqëkäyämun tsë selläma shumaq Edén huertapita. ¿Musyankiku imanir-raq?

Mana allita rurayashqa kayaptinshi. Y tsëshi Jehová castiguëkan. ¿Musyankiku Adán y Eva rurayanqanta?

Jehová, ‘ama rurayankitsu,’ nenqantash rurayashqa. Pëqa, ‘montikunapa frütankunataqa mikuyankim,’ ninaqshi. Pero ‘huk montipa frütantaqa ama mikuyankitsu, tsëta mikorqa wanuyankim,’ ninaqshi. Tsëqa, kikin Jehovällapaqshi kanaq. Y musyantsikmi hukpa imantapis yatëqa mana alli kanqanta, tsëpenqa, ¿imaraq pasarqan?

Huk hunaq hapallanlla Eva tsë selläma shumaq huertachö këkaptinshi, huk culebra parlapärinaq. ¡Pensakurki! Jehová, ‘ama tsë frütataqa mikunkitsu,’ nenqantash, tsë culebraqa ‘mikukurki,’ ninaq Ëvata. Jehoväqa manash culebrakunata kamanaq parlayänampaqtsu. Tsëpenqa, ¿piraq culebrata parlëkätserqan Ëvata parlapänampaq?

Manash Adantsu kanaq. Huk angelshi kanaq, ¿yarpankiku angelkunata? Manaraq patsata rurarshi Jehová atska angelkunata ruranaq, pëkunataqa manash rikëta puëdentsiktsu. Tsëshi huk ángel mana alli y orgulloso tikrakurinaq. Tsënö karshi munanaq Teyta Diosnö gobernante këta y llapan nunakunapis pëllata wiyakuyänanta. Tsënash tsë ángel culebrata parlaratsinaq.

Tsënöshi kë ángel ulipëkunaq Ëvata. ‘Y Teyta Diosnö alli yachaqmi tikrarinki kë frütata mikorqa,’ niptinshi, Ëvaqa creirinaq. Tsënash tsë frütata mikurkunaq y Adanpis tsënöllash ruranaq. Tsënö Jehoväta mana wiyakurninshi Adán y Ëvaqa, oqrariyänaq tsë selläma shumaq huertachö täräyänanta.

Pero chämonqam tiempo, Teyta Dios hinantin Patsata selläma shumaq Edén huertatanö yapë tikratsimunampaq. Tsëpeqnam rikäshun imatash qam rurankiman tsëchö kanëkipaq. Kanannam rikärishun Adán y Ëvata ima pasanqantapis.