QAMMAN huk hatun nuna peqampis wayikipa tëchonwan topaq shamuptin, ¿imaraq ninkiman? ¡Huk tsëtsikan mantsëpaq nuna o gigantem ninkimanchi! Unë tiempochöshi kanaq rasumpëpa tsënö hatusaq mana alli nunakuna kë Patsachö. Tsë nunakunapa papäninkunaqa kanaq ciëlopita angelkunash, nimantsikmi Bibliachöqa. Pero ¿tsëqa imanöraq karqan?

Yarpë, tsë mana alli ángel Satanasshi causëkänaq tsë imëka mana allikuna kanampaq. Hina Teyta Diospa alli angelninkunapis mana alli kayänampaqshi Satanasqa ishkitsita tïrëkänaq. Tiempowannash wakin angelkunapis Satanasta qatir qallëkuyänaq. Y ciëlochö Teyta Diospaq uryayänantapis haqiriyänaqshi. Patsaman shamïkurshi nuna tikrariyänaq. ¿Musyankiku imanir-raq?

Patsachö shumaq warmikunata rikarshi bajakarayämunaq pëkunawan këta munar ninmi Bibliaqa. Tsënöpash shamur casakuyänaq warmikunawan. Pero pëkunataqa Teyta Dios ruranaq ciëlollachö kayänampaqshi, tsëshi kë angelkuna rurayanqanqa alläpa mana alli kanaq ninmi Bibliaqa.

Y tsurinkuna yurirpis hukläyash kayänaq. Yuririrllaqa manash hukläyanötsu kayänaq. Pero tsëpita winar winarnash más kallpayoq y hatusaq mantsëpaq nunakuna tikrakuriyänaq.

Alläpa mana allish kayänaq kë hatusaq nunakunaqa. Y tsënö hatusaq y kallpayoq karshi, wakin nunakunata alläpa imëka mana allitapis rurayänaq. Pëkunanö mana alli kayänampaqshi wakinkunatapis obliguëta tïrayänaq.

Pero Enoc wanushqana kaptimpis, Patsachöqa kanaqraqshi huk alli nuna. Tsë nunapa shutinshi kanaq Noé. Teyta Dios munanqantash pëqa imëpis ruranaq.

Huk kutinash, ‘llapan mana allikunata ushakätsimunä tiempo chämushqanam,’ ninaq Teyta Dios Noëta. Pero Noëta familianta y atska animalkunatapis Diosqa salvananshi kanaq. Mä rikärishun imanöshi ruranaq.