WAMAYËPAQ Tamya pasariptin wakin nunakuna täraq ëwayanqan markapa shutinshi kanaq Ur. Tsë markaqa alläpa importante y shumaq wayikunayoqshi kanaq. Pero uli dioskunatash tsëchö täraq nunakuna adorayänaq. Babelchöpis tsënöllash rurayaq. Urchö y Babelchöqa mananash kanaqnatsu Teyta Dios sirveq nunakuna, Noëwan tsurin Semllanash Jehoväta sirveq nunakuna kayänaq.

Noëqa wanurinaq 350 watana diluvio pasashqanchönash. Y wanonqampita ishkë watallatanash kë dibüjochö rikanqëki nuna yuririnaq. Teyta Diospaqqa akrashqa y alli nunash kanaq. Abrahán ninaqshi pëpa shutenqa. Y tsë Ur markachöshi familianwan täräyänaq.

Huk kutish Jehová ninaq Abrahanta: ‘Kananmi rikätsishqëki huk nacionta, tsëman ewki kastëkikunata y Ur markëkita haqirïkur,’ nishpa. ¿Ur markanchö llapan imëkantapis haqirïkurtsuraq Teyta Diosta wiyakorqan? Awmi wiyakunaqshi. Tsëshi reqiyänaq Teyta Diospa amïgon nishpa, imëpis pëqa Diosta wiyakushqa kaptin.

Urpita Abrahán ewkuptinshi wakin familiankunapis pëwan ëwayänaq. Papänin Taré. Sobrinon Lot. Y warmin Sara. Tiempowannash Harán markaman llapan chäriyänaq, tsëchönash Abrahanpa papänin Taré wanurinaq. Urpitaqa karuchönash kayänaq.

Tsëpitanash, Haranpita Abrahán familianwan ewkuyänaq Canaán markata. Tsëchönash Jehová ninaq: ‘Wambrëkikunatam qoshaq kë allpata,’ nishpa. Carpakunallachöshi täränaq Abrahán Canaán markachö quedakurnin.

Tsëchöshi, üshankunapis y imëka animalninkunapis mirëkunaq y sirveqninkunapis pachakpayanshi kanaq, tsënöshi Jehová Abrahanta yanapanaq. Pero Abrahán y Särapaqa manash wambrankuna kanaqtsu.

Tsëshi, ‘alli atska markakunachö täraq nunakunapa papäninmi kanki,’ nishpa ninaq Jehová Abrahanta 99 watayoqna këkaptin. Pero Abrahán y Säraqa edänash kayänaq, ¿imanöraq wambrankuna kanman karqan?