¿ABRAHÁN rurëkanqanta rikankiku? Wambrantatsumchi wanïkatsenqa, huk cuchïllotam tsararëkan. ¿Imanir-raq? Puntataqa, rikärishun imanöshi Abrahán y Sara tariyashqa wambrankuna.

Yarpärïki, huk wambrankuna kanampaqshi Teyta Dios äninaq. Pero Abrahán y Säraqa alläpa edänash kayänaq, manash creipaqnönatsu kanaq. Mana creipaqnö kaptimpis, Abrahanqa Jehová rurëta puëdenqanmanshi markäkunaq. Tsëpenqa, ¿imaraq pasarqan?

Huk wataraqshi pasanaq, Abrahanta tsë llapanta Teyta Dios änenqampita. Pero Abrahán 100 watayoq y Sara 90 watayoq këkäyaptinshi, Isaac shutiyoq wambrankuna yuririnaq. ¡Tsënöpash Teyta Dios cumplinaq änenqanta!

Pero Isaac jövenyäriptinnash, Abrahanpa fëninta Jehová probanaq. ‘¡Abrahán!’ nishpash qayarinaq, y Abrahannash, ‘¡këchömi këkä!,’ nishpa yaskirinaq. Tsënash Teyta Dios kënö ninaq: ‘Huk hirkatam rikätsishqëki, tsëtam ëwanki hapallan tsuriki Isaacta aparkur. Y tsëchömi wambrëkita wanuratsir sacrificämunki.’

¡Abrahanqa alläpash kuyanaq tsurinta, tsëshi pëqa alläpa llakinaq! Hinamampis Teyta Diosqa äninaq Canaán markachö tsurinkuna kawayänampaqshi. ¿Yarpankiku? Pero ¿Isaac wanushqana këkaptenqa imanöraq kanman karqan? Teyta Diostash Abrahanqa wiyakunaq mana tsë llapanta käyirpis.

Hirkaman chärirnash, ruranqan altar hananman Abrahanqa churarinaq chakinta y makinta watarkur Isaacta. Tsëpeqnash tsurinta wanutsinampaq huk cuchïllota horqarinaq. Pero Teyta Diospa angelninnash qayëkunaq ‘¡Abrahán, Abrahán!’ nishpa tsurinta wanutsinampaq këkaptin, y Abrahannash, ‘¡këchömi këkä!’ nishpa yaskirinaq.

Tsënash Teyta Dios ninaq: ‘Ama wanutsitsu ni imanëtsu tsurikita.’ ‘Hapallan tsuriki këkaptimpis manam negakorqonkitsu, tsëmi kanan musyä noqaman fëniki kanqanta,’ nishpa.

¡Llapan shonqunwanmi fënin karqan Abrahanpaqa Teyta Diosman! Tsëshi, pëqa Jehová wanushqakunapitapis Isaacta sharkatsimunanta creinaq, y mana ni imapis Diospaqqa alläpa sasa kanqanta. Pero manash rasumpatsu Teyta Diosqa Abrahán Isaacta wanutsinanta munanaq; tsëshi huk montiman huk üshata awrikäratsinaq y Isaacpa rantin tsë üshata sacrificänampaq ninaq Abrahanta.