ATSKA watanash pasanaq. Y atska wambrayoqnash kayänaq Noëpa tsurinkunapis. Hina willkankunapapis wambrankuna kanaqshi. Tsënöpanash Patsachö atska nunakuna mirëkuyänaq.

Tsë atska nunakunapa rurinchöshi kanaq huk nuna, Nemrod shutiyoq, pëqa kanaq Noëpa willkampa tsurinshi. Tsë nunaqa alläpa mana allish kanaq, animalkunata y nunakunatapis wanutseqllanash. Hina wakin nunakunata gobernanampaqshi rey tikranaq. Tsëshi Nemrodqa Teyta Diosta mana gustanaqtsu.

Huk idiömallatash tsë tiempochöqa llapan nunakuna parlayänaq. Nemrodqa pëlla gobernëta munarshi llapan juntolla täräyänanta munanaq. ¿Imanötaq tsëta rurarqan? ‘Huk markata y tsëchö huk hatun törreta rurayë’ ninaqshi llapan nunakunata. Ladrillo rurëkaqkunata kë dibüjochö rikanqëkinö.

Kë hatun torre rurëkäyanqanqa manam Jehová Diostaqa gustarqatsu. Pëqa hinantin Patsachö nunakuna täräyänantash munanaq. Pero pëkunaqa, ‘¡aku! Huk markata y huk hatun törreta ruramushun ciëlomampis chanqanyaq. ¡Y reqishqam kashun!,’ niyänaqshi: pëkunaqa alabanzata ashikäyänaq kikinkunallapaqshi manash Teyta Diospaqtsu.

Tsënash tsë törreta rurar ushayänanta Teyta Dios munanaqnatsu. ¿Imanöraq rurarqan? Huk idiömallata parlëkäyaptinshi, Teyta Diosqa tukïläya idiömakunata parlëkatsinaq llapan nunakunata. Parlapänakurnimpis manash käyinakuyänaqnatsu. Tsëshi Babel o Babilonia “Pantatsinakï” ninan tsë markankunapa shutin kanaq.

Tsënash Babelpita nunakuna ewkur qallëkuyänaq. Hinantin Patsapash käyinakoqpura täkoq ewkuyänaq.