KË DIBÜJOKUNATA rikë. Egiptoman Jehová castïgokuna churanqantam rikätsimantsik. Qallanan dibüjochö Nilo mayuta Aarón shukshunwan toqïkanqanshi kanaq punta castigo. Tsënöpash tsë mayu yaku yawarman tikrarïkur asyar qallëkunaq, y llapan pescädokunapis limpush wanuriyänaq.

Tsëpitanash, Nilo mayupita Jehová ratsakkunata yarqëkatsimunaq. Mëchö tsëchöpis purikïkäyänaq ratsakkunallanash, tanta rurakuyänanchöpis, hornonkunachöpis, cämankunachöpis kanaqllanash. Qotu qotush egipciokuna pelëkuyänaq tsë ratsakkuna wanuriyaptin, tsënash hinantin Egipto nación limpu asyärinaq.

Tsë pasariptinnash, shukshunwan Aarón patsata takapäriptin allpapa qontatënin uchusaq kanikoq tushpikunaman tikrarinaq. Këshi kanaq kima kaq castigo.

Wakin castïgokunaqa manash israelïtakunapaqtsu kanaq, egipciokunallapaqshi. Chusku kaq castïgoqa kanaq hatusaq tushpikunash, y llapan egipciokunapa wayinkunamanshi limpu huntariyänaq. Pitsqa kaq castïgonash animalkunata limpu wanïkatsinaq. Egipciokunapa wäkankuna, cabrankuna y üshankunapis atskash tsë castïgowan wanïkuyänaq.

Tsëpitanash, Moiseswan Aarón uchpata aptarkur wiktsiriyänaq, tsënash nunakunatapis y animalkunatapis limpu chupu usharinaq. Këshi kanaq hoqta kaq castigo.

Tsëpitanash ciëloman makinta pallarkur Moisés kamäriptin, Jehová wamayëpaq runtïkatsinaq räyullantin. Manash ni imëpis tsënöqa Egiptochö runtushqatsu kanaq.

Pinteq kurukunash puwaq kaq castïgoqa kanaq. Manash ni imëpis tsënö wamayëpaq pinteq kurukunaqa kashqatsu kanaq y tsëpitapis mananash kanaqnatsu. Runtu mana ushakätsishqantaqa limpush ushakurkuyänaq.

Hina kima hunaqshi hinantin Egiptota ampiräkunaq, pero israelïtakuna täräyanqantaqa manash ampïnaqtsu. Tsëshi kanaq isqon kaq castigo.

Tsëpitanash, ‘wayikikunapa numbralninkunaman y punkupa ishkan lado qerunkunaman huk malta üshapa o huk cabrïtopa yawarninta tsaqtsuyanki’ ninaq. Tsënash Egiptopa pasarinaq Teyta Diospa angelnin. Yawarta punkunkunachö rikarqa manash ni pita wanutseqtsu tsë ángel. Pero mana yawarta rikarqa, nunapa y animalpa punta yurishqa tsurintapis wanïkatseqshi. Tsëshi kanaq chunka kaq castigo.

Kë castigo pasariptinshi, israelïtakunata ewkuyänampaq haqirinaq Faraón, y tsë ampillanash Egiptopita ewkuyänaq llapan israelïtakuna listollana kashqa karnin.