¿PIKUNARAQ kayan Jacobwan parlëkaq nunakuna, musyankiku? Huk pozo hawanchöshi taririnaq kë nunakunata, atska hunaqna ëwanqanchö. Üshankunatash täpëkäyänaq. ‘¿Mëpitataq kayanki?,’ nishpash tapukurinaq Jacob.

‘Haranpitam,’ niyänaqshi.

‘¿Reqiyankiku Labanta?,’ nishpash tapukurinaq Jacob.

‘Awmi,’ nishpash yaskiriyänaq. ‘Rikë, taqë üshanwan sharëkämoqmi Labanpa tsurin Raquel.’ ¿Rikankiku Raquel sharëkämoqta?

Tsënash Jacobqa ëwar pozo tsaparaq rumitapis witiratsinaq, Raquel qatimonqan Labanpa üshankuna yaküyänampaq. Tsëpitanash Jacobqa Raquelta mutsarinaq y pï kanqantapis willarinaq. Tsë hörash alläpa kushishqa papänin Labán willaq ewkunaq Raquel.

Pëpa wayinchö Jacob quedakunan kaptinshi alläpa kushïkunaq Labanqa. Y, ‘tsuriki Raquelwanmi casakïta munä,’ nishpa Jacob niptinshi Labanqa masraq kushïkunaq. Pero Raquelwan casakunampaqqa, qanchis wata pëpa chacranchö uryanantash munanaq. Raquelta alläpa kuyarninshi Jacobqa tsënö ruranaq. ¿Imaraq pasarqan Jacob casakunampaqna këkaptin?

Raquelpa rantinshi, Labanqa mayor tsurin Lëata qoykunaq Jacobta. Tsëpitana qanchis wata más uryanampaq parlariyaptinnash Raqueltapis hina warmimpaq qoykunaq. Tsë tiempokunachöqa ishkë warmiyoq nunakuna kayänampaqshi Teyta Dios permitinaq. Pero kananqa huk warmishqallash nunakuna kayanman ninmi Biblia.