EGIPTO nacionman Moisés kutirirninshi, wawqin Aaronta willanaq milagrokunapita. Israelïtakunaman ëwar tsë milagrokunata Moiseswan Aarón rurariyaptinshi, llapan creiyänaq Jehová pëkunawan këkanqanta.

Tsënash, Faraón rikaq ëwayänaq Moiseswan Aarón. Tsëshi, ‘Israelpa Diosnin Jehovämi kënö nishqa’ niyänaq: “Desiertochö kima hunaq adorayämänampaq markäta haqirïki.” Tsënash Faraonqa: ‘Noqaqa Jehoväman manam creïtsu. Manam Israel ëwanantapis haqishaqtsu,’ nishpa ninaq.

Jehoväta adorayänampaqshi, israelïtakuna tiempo horqëta munayänaq uryakïninkunapita, tsëshi Faraonqa alläpa piñëkunaq. Tsënash masraq uryëkatsinaq. Y tsënö mana alli tratëkuyaptinnash Moisesta israelïtakunaqa tumpëkuyänaq, tsënash pëqa alläpa llakinaq. ‘Pero ama llakitsu ni yarparëtsu,’ ninaqshi Jehoväqa. ‘Markäta Faraón imëkanöpis haqinantam rurashaq,’ ninaqshi.

Yapëshi Faraón rikaq Moiseswan Aarón kutiyänaq. Tsëchönash huk milagrota rurariyänaq. Huk hatun culebrash tikrarinaq Aarón shukshunta patsaman churariptin. Pero Faraonpa yachaqninkunapis shukshunkunatash patsaman churariyänaq, hina tsë shukshukunapis culebramanshi tikrariyänaq. Pero ¡rikë!, tsë Faraonpa yachaqninkunapa culebrankunatam Aaronpa culebran mikukurkun. Y tsëpis manaraqshi israelïtakuna ewkuyänampaq haqita munanaqraqtsu Faraonqa.

Pero Faraonta Jehová pï kanqantapis musyatsinan tiemposh chärinaq. ¿Imanöraq rurarqan musyankiku? Chunka castïgotash Jehová apamunaq Egiptoman.

‘Israelta kacharamunäpaq, pärëkatsillämi kë castïgollatana,’ nishpash ninaq Faraonqa Moisesta qayarirnin. Pero tsë castigo pärariptenqa mananash israelïtakuna ewkuyänanta munaqnatsu. Pero chunka kaq castigo pasariptinnash, ewkuyë ninaq israelïtakunata.

¿Mëqanyanraq kayarqan tsë chunka castïgokuna, musyankiku? Kë waqtanllachönam yachakushun mëqanyan kayanqantapis.