¿ARCAPITA Noé familianwan yarqaramurnin, imataraq puntata rurayarqan? Puntataqa rurayarqan Teyta Diospaq huk sacrificiotam. Kë ura dibüjochö rikanqëkinö. Wamayëpaq tamyapita familianta salvashqa kaptinmi, Noé agradecekurnin kë animalkunata sacrificarqan Diospaq.

¿Kë sacrificio Jehoväta gustarqatsuraq? Awmi, gustanaqshi. Tsëshi äninaq Noëta, mana ni imëpis yapë nunakunata diluviowan ushakätsimunampaq.

Tsëpitanash Noé familianwan qallëkuyänaq mushoq kawëninkunata tsaki patsachö. ‘Atskam wambrëkikuna kanqa. Hinantin Patsachö nunakuna kanqanyaqmi mirayanki,’ nishpash Teyta Dios bendecinaq.

Pero tiempo pasaptenqa, nunakuna wamayëpaq tamyapita wiyarnin itsapis mantsakäyanman yapë tsënö kananta. Tsëshi, mana yapë Patsata yakuwan ushakätsimunanta nunakuna yarpäyänampaq Teyta Dios churanaq huk señalta. ¿Ima señalraq karqan, musyankiku? Huk tormanyëmi karqan.

Tsëmi rikantsik tamya pasarishqanchö Inti aktsïramuptin ciëlochö tsë tormanyëta. Tsë tormanyëqa shumaq tukï colormi. ¿Imëllaqa rikashqaku kanki? ¿Kë dibüjochö këkaqta rikankiku?

Kënöshi Teyta Dios ninaq: ‘Kënö wamayëpaq tamyawanqa mananam ni imëpis nunakunata ni animalkunata ushakätsimushaqnatsu. Pukutëkunamanmi tormanyënïta churëkämü. Kë äniyanqaqtam yarpärishaq tormanyë yuriramoqta rikar.’

¿Imataraq yarpärinkiman huk tormanyëta rikarnin? Wamayëpaq tamyawan Teyta Dios manana nunakunata ushakätsimunampaq änikonqantam.