RIKË, tsë shukshuchö wëtakunata y poqu almendrakunatapis. Aaronpa shukshunshi. ¡Huk ampillachöshi kë wëtakunapis y frütampis winarayämunaq! Mä rikärishun imanirshi.

Atska tiemponash desiertochö israelïtakuna purikuyashqa. Aarón sacerdote kananta ni Moisés pushaqninkuna kanantapis manash wakinqa munayantsu. Tsënö pensaqkunaqa kayänaq Coré, Datán, Abiram y 250 Israelchö reqishqa nunakunash. Kë llapanshi Moisesman shamurnin: ‘¿Imanirtaq qamqa mandakoqtukamunki hanäkunapa?,’ niyänaq.

Tsënash, ‘incensariokunaman churayë sömatsiyänëki inciensota warë qoya. Y Jehoväpa tabernäculonman shayämi, mä pitash pë akranqa,’ nishpash ninaq Moisés Corëta llapan qateqninkunatawan.

Tsënash, tabernäculoman waränimpana shayämunaq Coré 250 qateqninkunawan. Y yanapaqninkunapis atskash shayämunaq. Alläpa piñashqash këkan Jehová. Tsëshi, ‘kë mana alli nunakunapa carpankunapita witikuriyë,’ ‘ama pëkunapa imankunatapis yatayëtsu,’ nin Moisés. Tsënash tsë Coré, Datán y Abirampa carpankunapitaqa witikuriyan llapan wiyakoqkuna.

‘Kënöpam, pita Jehová akranqantapis musyayanki, kë mana alli nunakunata patsa kichakar limpu mikuriptin,’ nishpash ninaq Moisés.

Tsënash, patsa kichakärinaq Moisés parlar ushariptinllana. Y limpush tsapärinaq tsë patsa Corëpa llapan imëkantapis, hina Datán y Abiramwan llapan këkaqkunatapis. Tsëshi, nunakunata patsa ñoqtaptin qapareqta qayareqta wiyar: ‘¡Safakushun! ¡Noqantsiktapis ñoqtakarkamashwan!,’ nishpa qaparikachäyänaq.

Tabernáculo lädonchöraqshi këkan Coré 250 qateqninkunawan. Y limpush rupariyänaq Jehová kachamonqan ninawan. Tsënash, ‘llapsha altarpaq tsapanan rurë tsë wanushqakunapa incensarionkunapita,’ ninaq Jehová Aaronpa tsurin Eleazarta. Tsëshi, Aaronwan tsurinkunalla sacerdötenö Jehoväta serviyänampaq señalnö kanaq, israelïtakunapaq tsë altarpa llapsha tsapanan.

Pero Aarontawan tsurinkunallata sacerdötenkunatanö akranqantash Jehová alleq claro kananta munanaq. Tsëshi, ‘shukshunkunata apayämutsun Israelpa chunka ishkë kastakunapa pushaqninkuna. Aarón shukshunta apamutsun Leví kastapaqqa. Tsëpitana arca del pacto nishqampa tsimpanman churë llapampa shukshunkunata. Wëtäramonqam sacerdötepaq akranqä nunapa shukshonqa,’ nishpash ninaq Jehová Moisesta.

Waränin Moisés rikärinampaqnash, ¡kë wëtakuna y poqushqa almendrakuna yarqaramushqa kanaq Aaronpa shukshumpita! ¿Imanir Aaronpa shukshun wëtäramonqantapis kananqa käyirerqonkiku?