¡RIKË carpanman kë nuna pampëkanqanta! Huk shumaq träjeta, huk barra örota, y qellëkunata. Jericó markapitash kë llapanta horqashqa. Pero ¿imataraq rurayänan karqan kë Jericöpeq horqayanqanwanqa? ¿Yarpankiku?

Ushakätsiyänanshi kanaq y Jehoväpa tabernäculonmanshi qoyänan kanaq örota y qellëtaqa. Tsënöshi Teyta Diosta mana wiyakuyashqatsu kë nunakunaqa. Teyta Diospaq kaqtash suwakuyashqa. Acán ninshi tsë nunapa shutenqa y pëwan këkaqkunaqa familiankunash kayan. Rikärishun mä imash pasan.

Kë llapanta Acán suwakushqanchönash, Hai markawan peleayänampaq Josué kachan nunankunata. Pero limpush ëwatsiyämun Josuëpa nunankunataqa tsë Hai markapeq nunakuna. Wakinshi wanuyan y wakinshi safakuyan. Pero alläpash llakin Josuëqa. Tsënash, ‘¿imanirtaq kë pasananta permitinki?,’ nishpa Jehoväman mañakunaq.

Tsënash Jehová nin: ‘¡Sharkï! Israelqa hutsallakushqam. Teyta Diospa tabernäculompaq o ushakätsiyänan kaqtam apakuyashqa. Huk shumaq träjetam suwakuyashqa y manam willakuyantsu. Tsë suwata y suwakushqanta mana ushakätsiyaptikeqa manam bendiciyashqëkitsu.’ Mëqan tsë mana alli nuna kanqantapis rikätsenqash, ninshi Jehová Josuëta.

Tsëpitanash llapan israelïtakunata Josué qayaratsinaq y llapampitanash Jehová horqaramunaq tsë Acán mana alli nunata. Tsënash, ‘hutsallakorqömi. Atska qellëkunatam, huk barra örotam y shumaq träjetam rikärerqä. Këkunata alläpa munarninmi apakorqä. Carpä rurinchömi pamparëkäyan tsëchömi taririyanki,’ ninshi Acán.

‘¿Imanirtaq kë mana allita rurëkayämarqonki? ¡Kananqa qamtapis tsënöllam Jehová rurashunki!,’ nishpash Josué ninaq Acanta, llapanta tarïkur aparayämuptin. Tsënash Acanta llapan familiantawan tsampikïkuyan wanuyanqanyaq llapan nunakuna. Tsëpenqa, ¿apakushwantsuraq imatapis mana noqantsikpa këkaptin? ¿Imataraq këpita yachakuntsik?

Tsëpitash Hai markawan peleaq Israel yapë yarqun. Pero kananqa, ganayanshi israelïtakuna peleachö Jehová yanapaptin.