¿IMËLLAPIS huk parlaq ashnupita wiyashqaku kanki? ‘Manam,’ ninkichi. ‘Manam parlayantsu animalkunaqa.’ Pero huk ashnuqa parlanaqshi ninmi Bibliachö. Mä rikärishun imanöshi kë pasanaq.

Canaán markaman yëkuyänampaq casi listonash këkäyänaq israelïtakuna. Y alläpash pëkunata mantsanaq Moabpa reynin Balac. Tsënash, israelïtakunata shamur maldecinampaq ashitsin Balaam nishqan nunata. Atska qellëtash äninaq Balac, tsënash Balaam ashnun montakurkur ëwanaq Balac rikaq.

Pero manash Balaam markanta maldecinanta munantsu Jehová. Tsënash, näniman shëkur Balaamta mana pasatsinampaq kachanaq huk angelta hatun espädantawan. Tsë angeltaqa ashnunllash rikänaq, manash Balaamqa rikantsu. Tsënash tsë ashnuqa punukïkunaq nänichö angelpita witikïta tïrar. Huk shukshuwanshi Balaam ashnunta wilukïkun alläpa piñarnin.

Tsënash, tsë ashnu parlaqta wiyëkatsinaq Jehová Balaamta. ‘¿Imanarqoqtaq tsënö maqamänëkipaq?,’ nishpash tapunaq ashnun.

Tsënash Balaamqa: ‘Upapaqnömi churamarqonki.’ ‘¡Espada kaptenqa këllachömi wanuratseqman!,’ nishpash ninaq.

Tsënash ashnunqa, ‘¿imëllaqa tsënö tratashqaku kaq?,’ ninaq.

Balaamnash ‘manam,’ ninaq.

Tsëpitanash nänichö espädanwan shëkaq angelta Jehová rikäratsinaq Balaamta. Tsënash, ‘¿imanirtaq ashnïkita maqarqonki? Manam Israelta maldeciq ëwankimantsu, tsëmi näniki llaweq shamorqö. Wanïkatseqmanmi karqan mana ashnïki noqapita wititsishuptikeqa, pero ashnïkitaqa manam imanämantsu karqä,’ ninaqshi tsë ángel.

‘Manam nänichö këkanqëkita musyarqötsu, hutsallakorqömi,’ ninaqshi Balaam. Tsënash ángel haqirinaq, pero imanö kaptimpis Balac rikaqshi ëwan Balaamqa. Y Israel maldecitaraqshi tïran, pero Jehoväqa kima kutish bendecitsinaq.