SINAÍ o Horeb nishqan hirkamanshi israelïtakuna chäriyänaq Egiptopita ishkë killa yarquyanqanllachö. Tsëchöshi rawrëkaq montipita patsë Moisesta Teyta Dios parlapänaq. Y huk tiemposh israelïtakuna tsëchö quedakuyänaq.

Tsënash Moisés hirkaman lloqanaq wakin nunakuna shuyäyanqanyaq. Tsëchöshi, ‘israelïtakuna akrashqa markä kayänantam y wiyayämänantam munä,’ ninaq Jehová Moisesta. Y llapan Jehová nenqantash israelïtakunata willanaq Moisés tsë hirkapita kutiramurnin. Tsënash Jehoväpa markan këta munar, llapan nunakuna ‘wiyakuyäshaqmi,’ niyänaq.

Kanannash mana imëpis rikäyanqantanö rurëkunaq Jehová. Qoyëtash hirkapita yarqëkatsimunaq, y wamayëpaqshi bururïkatsinaqpis räyukoqnöraqshi këkunaq y patsapis kuyurinaqshi. ‘Egiptopita horqamushoq Diosnikim kä,’ nishpash parlapärinaq israelïtakunata. Hina: ‘Noqapita huk dioskunataqa ama adorayankitsu,’ nishpash mandanaq.

Tsëmanshi hina isqon mandamientokunata o leykunata Jehová qonaq israelïtakunata. Alläpash llapan nunakuna tsëchö mantsakëkuyänaq. Tsëshi: ‘Teyta Dios noqakunata parlapäyämaptenqa itsa wanuyämampis, qamlla parlapëkayämë,’ nishpash niyänaq Moisesta.

Tsëpitanash, ‘kë hirkaman lloqamï. Llapan marka wiyakuyänampaqmi, qoshqëki ishkë palta rumikunachö qellqanqä leynïkunata,’ ninaq Moisesta Jehová. Tsënash hirkaman yapë Moisesqa kutirinaq. Y tsëchöshi quedakamunaq 40 hunaq y 40 ampi.

Markampaqshi Teyta Diospa leyninkuna atska kanaq. Moisesshi qellqanaq. Hina ishkë palta rumikunatapis Moisestash qomunaq Teyta Dios. Tsëchöshi llapan markanta parlapanqan chunka leyninkuna kikin qellqashqan këkänaq. Chunka Mandamientosh shutin.

Alläpa importante leykunash kayan kë Chunka Mandamientokunaqa. Pero wakin kaq leykuna israelïtakunata qonqampis importantesh kanaq. Tsëmi huknin kaq kënö nin: ‘Jehová Diosnikillata kuyë llapan shonqïkiwan, llapan yarpënikiwan, llapan kawënikiwan, y llapan kallpëkiwan.’ Y hukninnam nin: ‘Kikikitanö nuna mayikita kuyë.’ Israel markanta Teyta Dios leyninkunata qonqampita más importante kë ishkanshi kayänaq, nishpash ninaq Jesucristo. Tsëpitanam, Teyta Diospa Tsurimpa yachatsikïninkunapitaqa más yachakushun.