¿RASUMPËPANÖTSURAQ tsë shukshuta wankurëkaq culebra? Manam. Cobrepita rurashqash. ‘Shukshuman churarkur pallari tsë culebrata nunakuna rikarnin salvakuyänampaq,’ nishpash ninaq Jehová Moisesta. Pero patsachö purikaq culebrakunaqa rasumpash kayan. Qeshyëkatsinaq limpush nunakunata kanirnin. ¿Imanir-raq?

Teyta Diospa y Moisespa contran israelïtakuna parlayashqa kayaptinshi. ‘¿Imapaqraq horqayämarqëki Egiptopita kë desiertochö wanuyänäpaq? Këchöqa ni yaku ni mikï manam kantsu. Utiriyarqönam kë manällata mikukurnin,’ nishpash israelïtakuna quejakuyänaq.

Pero alli mikïshi maná nishqanqa kanaq. Milagrösamentesh Jehová tsë mikïninkuna y yakunkuna qonaq. Jehová cuidanqantapis manash tsë nunakuna agradecikuyantsu. Tsëshi israelïtakunata castigarnin Jehová venenoso culebrakunata kachëkamunaq. Atskash wanïkuyänaq tsë culebrakuna kanïkuyaptin.

Por finnash, ‘Jehoväpa y qampa contrëkim parlayarqö. Kë culebrakunata horqarinampaq Jehoväman mañakëkami,’ nishpa niyänaq Moisesta tsë israelïtakuna.

Tsënash Jehoväta Moisés mañakunaq pëkunapaq. Jehovänash, ‘cobrepita huk culebrata rurarkur huk shukshuman churë y llapan culebra kanishqakunam tsëta rikäyanman,’ ninaq Moisesta. Teyta Dios nenqannöshi ruranaq Moisés. Y tsë cobrepita rurashqa culebrata rikärirshi alliyäriyaq yapë llapan kanishqa kaqkunaqa.

Huk alli ejemplotam këpita yachakushwan. Culebra kanishqa israelïtakunanömi llapantsik kantsik. Wanuntsik, qeshyantsik y awkinyantsik. Kë llapan pasamantsik Adán y Ëvapa wambrankuna kashqam, pëkunaqa manash Jehoväta wiyakushqatsu kayänaq. Pero wiñeypa kawanapaqmi huk nänita Jehová Dios kichamun.

Tsurin Jesucristotam Patsaman Jehová kachamorqan. Pero wakin nunakunaqa mana pëman creirshi huk qeruchö wanïkatsiyänaq. Salvamänapaqshi Jehová kachamunaq. Wiñeypash kawashun pë ruranqanta qatirqa. Tsëpitanam këpitaqa masta yachakushun.