48 kaq willakï
Alli yachëyoq gabaonïtakuna
KANANQA israelïtakunawan peleayänampaqshi alistakïkäyan Canaanchö llapan markakuna. Ganëtash pensayan. Pero Gabaonchö täraq nunakunaqa manash tsënötsu pensayan. Pëkunaqa israelïtakunata Teyta Dios yanapanqantash musyayan, y manash Dioswan peleëta munayantsu. Tsëpenqa, ¿imataraq gabaonïtakuna rurayan?
Alläpa karu markachö täraqtanö israelïtakuna rikäyänantash munayan. Tsëshi wakinqa ushakëkaq llanqikunata y ratas röpakunata yakakuyan. Hina ushakëkaq costalkunatash ashnunkunaman cargayan y tsakishqa tantakunatash apayan. Tsënöshi Josuëman ëwayan y niyan: ‘Alläpa karu markapitam shayämorqö, Jehová Diosnikikunapita wiyarnin. Egiptochö qamkunapaq llapan ruramonqantapis wiyayarqömi. Tsëmi mikïnïkuna alistakurkur shamurnin: “Sirveqnikikunam kayä. Noqakunawan mana peleayänëkipaq änïkayämë,” nishpa niyänaqpaqmi kachayämashqa pushayämaqnïkuna. Qamkuna rikëkäyanqëkinömi, ratashnïkunapis y tantäkunapis limpu tsakir ushakäyashqa tsëläya karupita shayämonqächö,’ nishpash hina niyänaq.
Tsënash, tsë gabaonïtakunata Josuëwan wakin Israelpa pushaqninkunapis creiriyänaq. Y pëkunawan mana peleayänampaqshi äniriyänaq. Pero kima hunaq pasarishqanllachöshi, lädonkunallachö tsë gabaonïtakuna täräyanqanta musyariyänaq.
Tsënash: ‘¿Imanirtaq alläpa karupitam shayämorqö niyämarqëki?,’ nishpa tapurinaq Josué.
‘Kë Canaán markata Jehová Diosnikikuna qoyäshunëkita willayämashqa kayaptinmi. Hinamampis wanïkatsiyämänëkitam mantsayarqä,’ nishpash niyan tsë gabaonïtakuna. Pero äniyanqantaqa cumpliyanshi israelïtakunaqa, y gabaonïtakunata manash wanutsiyantsu, más bienqa sirveqninkunash tikraratsiyan.
Tsënash, Israelwan gabaonïtakuna yamë tikrariyashqa kaptin Jerusalenpa reynin alläpa piñakurkun. Tsëshi: ‘Shamur Gabaonwan pelear yanapëkayämë,’ nishpa ninaq wakin chusku reykunata. Y tsëtash rurayan pitsqan. ¿Alli yachëyoqtsuraq kayarqa gabaonïtakuna Israelwan yamë tikrarnin, kanan pitsqan reykuna pëkunawan peleëta munëkäyaptin? Mä rikärishun.