KË NUNAKUNA katarëkäyanqan frütakunata rikë. Ishkaq nunakunaraqshi shukshuwan katäyänaq tsë üvakunataqa alläpa hatun sartan kaptin. Hina rikë granädakunata y hïgoskunatapis. ¿Kë selläma shumaq frütakunataqa mëpitaraq apayämushqa? Canaán markapitash. Yarpë, Abrahán, Isaac y Jacob täräyanqan markash kanaq Canaanqa. Pero Egiptotash ewkunaq Jacobqa llapan familianwan mallaqë tiempo tsëman chäkïkuptin. Kanannash, Moisés israelïtakunata Canaanman yapë kutiratsin 216 wata pasashqanchöna. Cades nishqan desiertochönash këkäyan.

Alläpa mana alli nunakunash täräyan Canaanchöqa. Tsënash 12 musyapakoqkunata Moisés kachanaq: ‘Ëwar musyapakarayämi ëka nunakunash tsëchö täräyan, imanö kallpayoqshi kayan. Hina rikäyämunki murupakunapaq alli chacrakunakush kayan. Ama qonqayämunkitsu ima frütallatapis apamïta,’ nishpa.

Cädesman musyapakoqkuna kutiramurshi: ‘Alläpa alli nacionmi rasumpëpaqa,’ nishpa niyan Moisesta. Y apayanqan frütakunatash rikäratsiyan creiyänampaq. Pero chunka musyapakoqkunaqa: ‘Alläpa puëdeq, alläpa hatusaq nunakunam kayan tsëchö täraqqa. Wanïkatsimashwanchi nacionninkunata qochita tïrashqaqa,’ nishpash niyan.

Këta wiyarnash israelïtakunaqa alläpa mantsakäyan. ‘Kë desiertochö o Egiptollachöpis mejorqa wanukïkushwan karqa.’ ‘Tsurintsikkunatapis warmintsikkunatapis prësochi apayanqa, cananëokunawan pelear wanukïkushqaqa. ¡Moisespa rantin huk dirigimaqnintsik akrakurkur Egiptota kutikushun!,’ nishpash niyänaq.

Jehoväman markäkoq ishkë musyapakoqkunash kayan Josué y Caleb, tsënash: ‘Alërullam yëkurishun tsë markamanqa, Jehovämi noqantsikwanqa këkan, ama mantsakäyëtsu,’ nishpash niyan tsë nunakunata. Pero manash wiyakuyänaqtsu. Peorshi wanutsitapis munayänaq Josuëtawan Calebta.

Këqa Jehoväta alläpash piñëkatsinaq, tsëshi: ‘Canaanmanqa manam yëkonqatsu ni mëqan 20 watayoqpita witsëpa. Manaran noqaman markäkayämunraqtsu desiertochöpis, Egiptochöpis milagrokuna ruranqäta rikëkar. Tsëmi 40 wata desiertochö purikuyanqa llapan mana creikoqkuna wanuyanqanyaq. Canaán markamanqa yëkuyanqa Josuëwan Calebllam,’ nishpash ninaq Moisesta.