PROBLËMACHÖSHI kë nunakuna këkäyan. Mana wanutsiyänampaqshi safakuyänan. Rahab ninshi tsë yanapëkaq warmipa shutenqa y tsë musyapakoqkunaqa israelita nunakunash kayan. Jericó markapa perqan wayichöshi täran Rahabqa. Mä rikärishun imanöshi kë llapan pasanaq.

Canaán markaman yëkuyänampaqshi, Jordán mayuta tsimpayänampaq këkäyan israelïtakuna. Pero ishkë musyapakoqkunatash Josué puntata kachashqa. ‘Rikapakarayämï hinantin patsata, y Jericó markatapis,’ nishpa.

Rahabpa wayinmanshi ëwayan musyapakoqkuna Jericöman chärir. Pero Jericöpa reynintash: ‘Ishkë musyapakoq israelïtakunam shayämushqa ampi,’ nishpa willariyänaq. Tsëta wiyarirnash reyqa nunankunata: ‘¡Wayikichö nunakunata horqami!,’ nishpa niyänampaq Rahabpa wayinman kachanaq. Pero wayimpa hananmanshi Rahab pakëkushqa kanaq tsë nunakunata. Tsënash: ‘Shayämushqam nunakunaqa wayïman, pero manam musyätsu mëpita kayanqantapis. Asqürëkaq manaraq Jericöpa punkunkunata llawiyaptinmi ewkuyashqa. ¡Taripäriyankim raslla qatiparnenqa!,’ nishpash ninaq Rahab. Y tsë hörash asheq ewkuyan nunakuna.

Heqariyaptinnash, ëqillapa Rahab wayin hananman lloqarinaq. ‘Kë llapan markata Jehová qoyäshunëkita musyämi,’ ninshi musyapakoqkunata. Hina ‘Sehón y Og reykunata wanutsiyanqëkitapis, y Egiptopita yarqayämuptiki Puka lamarta Jehová tsakitsimonqantapis wiyashqam kayä. Alli këkuyë y yanapëkayämë, aksëqa kayëtsu qamkunawampis alli këkonqärëkur. Papänïta, mamänïta y llapan turïkunata y nanäkunatapis salvëkuyë,’ nishpash ninaq Rahab tsë musyapakoqkunata.

Tsënö rurayänampaqshi musyapakoqkuna äniyänaq. Pero Rahabtanash niyänaq, ‘ventänëkiman kë puka waskata watanki’ y ‘wayikiman llapan familiëkita ëllumunki. Y noqakuna kë markaman kutimur, manam familiëkita imanayäshaqtsu tsë waskata rikarqa.’ Musyapakoqkuna kutirirnash, llapan pasanqanta willariyänaq Josuëta.