¿MANAKU shumaq tsë wambra? Samuel ninshi shutin. Elí ninshi tsë wambra peqanman makin churëkaq nunapa shutenqa, Israelpa sumo sacerdötenshi. Tsë Elïman wambra apamoqkunaqa kayan papäninkunash, Ana y Elqaná ninshi shutinkuna.

Chusku o pitsqa watayoqnöllash tsë Samuel wambraqa. Pero Elí y wakin sacerdötekunawanshi täranqa Jehoväpa tabernäculonchö. ¿Imanir-raq Jehoväpa tabernäculonchö servinampaq Samueltanö wambrallata apëkayämunman karqa Elqaná y Ana? Mä rikärishun.

Alläpa llakishqash këkänaq Ana manaraq kë pasaptinqa. Mana wambran kapuptin hukllëllapis këkunantash munëkoq. Tsënash huk kuti Jehoväpa tabernäculon watukaq ëwanqanchö: ‘¡Ay Jehová, amari qonqëkamëtsu! Huk wawä kanampaq permitïkuptikeqa, qoykushqëkim, tsënöpa llapan kawëninchö servishunëkipaq,’ nishpa Jehoväman orakïkunaq.

Y tsë Änapa mañakïnintash Jehová wiyarinaq, tsënash Samuel yuririnaq killakuna pasariptin. Alläpash Änaqa wawanta kuyëkoq, tsëshi llulluraq këkaptin Jehová Diospita yachatsir qallëkunaq. Tsëpitanash, ‘ichik maslla winarkuptenqa tabernäculomanmi apëkushaq tsëchö Jehoväta servinampaq,’ nishpash ninaq qowanta.

Tsë Ana y Elqaná rurayanqantam dibüjochö rikantsik. Y Samuelqa kushi kushish këkan kë tabernäculonchö Jehoväta servinan kaptin, alläpa alli papäninkuna yachatsiyashqa kayaptin. Cada watash kë especial carpaman Jehová adoraq y wambrankuna watukaq shayämun papäninkuna. Hina mangannaq träjenshi maman Ana apapamun cada wata Samuelpaq.

Watakuna pasariyaptimpis, Jehoväpa tabernäculonchöshi servikan, tsëshi llapan israelïtakunatapis y Jehovätapis alläpa kushitsin. Pero sumo sacerdote Elïpa, Hofní y Finehás tsurinkunaqa, manash alli nunakunatsu kayan. Alläpa mana allikunata rurarshi, wakimpis mana Teyta Dios wiyakoq kayänampaq rurayan. Elïqa sacerdote këpita horqarinmanshi, pero manash tsënötsu ruran.

Pero tsë llapan mana alli tabernäculochö pasaptimpis, joven Samuelqa Jehová Diostash servinaq. Y alli unëshi mana ni pï nunata parlapashqatsu Jehová, rasumpëpa kuyaqnin nunakuna ichiklla kayaptin. Tsënash kë pasan Samuel ichik más winariptin:

Tabernäculochö Samuel punukïkarshi qayayaptin riyarkamunaq. Tsënash, ‘këchömi këkä,’ nishpa Elí kaqta sharkur ëqillapa ëwar: ‘Qayamarqonkim, y këchönam këkä,’ nishpa nin.

Pero Elïnash, ‘manam qayarqoqtsu, pununëkiman kutikï,’ nishpa ninaq. Tsënash Samuelqa pununanman kutikïkunaq.

Tsëpitanash yapë: ‘¡Samuel!,’ neqta wiyarin. Tsënash yapë sharkur Elí kaqta kutirinaq. ‘Qayamarqonkim, y këchönam këkä,’ nishpa. Tsënash Elïqa, ‘manam qayarqoqtsu wawa. Kutir punukï,’ nishpa ninaq. Tsënash yapë Samuelqa pununanman kutikunaq.

Hina yapëshi, ‘¡Samuel!,’ neqta wiyarinaq. Tsënash ëqillapa Elí kaqman kutirinaq. ‘Këchönam këkä, kananqa seguro qayamarqonkinachi,’ nishpa. Tsënash kananqa Jehová qayanqanta musyarinaq Elí. Tsënash, ‘pununëkiman ëwar patsäki, yapë pë qayakamuptenqa, “sirveqnikiqa wiyarëkäshunkim,”’ nishpa ninki ninaq.

Yapë Jehová qayariptinnash, Elí nenqannölla Samuel yaskirinaq. Tsëchönash, ‘tsurinkunatawanmi Elïtaqa castigashaq,’ ninaq Jehová Samuelta. Y pë nenqannöllash filistëokunawan peleëkar wanuriyänaq Hofní y Finehás, tsëta wiyarnash Elïqa ishkïkunaq wanoqpaq kunkan pakiriptin. Tsënöshi llapan Jehová nenqan cumplikärinaq.

Y Samuelnash, winarirnin Israelpa último jueznin tikrarinaq. Edäyäriptinnash, ‘gobernayämaq huk reynïkuna akramï,’ niyan israelïtakuna. Pero manash munantsu Samuelqa, rasumpëpa pëkunapa reyninkunaqa Jehovälla kaptin. Tsënash, israelïtakunata wiyanampaq nin Jehová Dios Samuelta.