ALLÄPA sasa kawëkunaman ishkirirshi israelïtakuna mañakuyan Jehoväman. Tsënash Jehová yanapayänampaq valiente pushaqninkuna qornin yaskinaq. Jueces ninmi Bibliachöqa. Llapampa punta juezninkunaqa kanaq Josuëshi, tsëpitanash Otniel, Aod y Samgar kayänaq wakin juezninkuna. Pero warmish kayänaq ishkë Israel yanapaqkunaqa, Débora y Jael ninaqshi kë warmikunapa shutinkunaqa.

Profetïzash Dëboraqa. Shamoq tiempochö ima pasanantapis Jehoväshi pëtaqa willan, y pënash Jehová nenqanta llapan nunakunata willanaq. Hina juezshi Dëboraqa. Tsëshi hirka palmera hawanllachö imëpis täkun y tsëmannash problëmankunata altsar yanapanampaq nunakuna ëwayan.

Tsë tiempochöqa Canaanpa reynin, Jabín shutiyoq nunash. Y guërrapaq cärronkunash kanaq 900. Tsëshi Jabinpa soldädonkuna alläpa puëdeq kayaptin, wakin israelïtakuna pëpa sirveqnin tikrashqa kayänaq. Sísara shutiyoq nunash Jabinpa soldädonkuna mandaqqa.

‘“Tabor hirkaman 10.000 nunakunata apë. Tsëmanmi Sïsarata apamushaq. Soldädonkunatawan pëta ëwatsinëkipaqmi yanapashqëki,” nishpam nishqa Jehová,’ ninaqshi Débora juez Baracta qayarïkur.

Tsënash: ‘Noqawan qam ëwaptikiran ëwä,’ ninaq Barac Dëborata. Tsëshi ëwan Débora, pero: ‘Huk warmipa makinmanmi Jehová qonqa Sïsarataqa, manam qamtsu honrashqa kanki,’ nishpa ninaq Baracta, y tsënöshi pasanaq.

Sïsarapa soldädonkunawan topanampaqshi Tabor hirkata Barac ëwanaq. Tsëchönash wamayëpaq atska yakuta Jehová yarqëkatsimunaq, y tsëwanshi limpu chikeqnin nunakuna wanïkuyänaq. Sïsarapis safakunaq cärrompita yarpurirshi.

Tsënö safanqanchönash Jael nishqan warmipa wayinman chärinaq. Tsënash Jaelqa wayinman yëkaratsir lëchen qorinaq. Tsëta upurirllanash punukärinaq. Punukäriptinnash Jael peqachö huk estäcawan clavëkunaq, estäcapis peqanman illakanqanyaq. ¡Tsëpitanash wanushqa Sísara nunata rikäratsin Barac shamuptin! Tsënöshi cumplikärinaq Débora nenqan.

Hina rey Jabintapis wanuratsiyänaqshi, tsënöpash yamë huk tiempo kayänaq israelïtakuna.