¿RIKËKANKIKU këchö pasëkanqanta? Kë achkastam tsë wambra ösota qochïkushqa. Mikukurkunampaqshi tsë oso apakushqa kanaq achkasta. Pero qatipëkurshi ösopa shimimpita qochirinaq achkasta tsë wambraqa. ¡Y oso tikrapïkuptinnash, wanuratsinaq! Hina huk leontapis qochinaqshi huk üshata. ¿Valiente manaku parecipushunki kë ruraq wambra? ¿Piraq kë wambra?

Joven Davidshi. Belén markachöshi pëqa täran. Rut y Boazpa wambran Obedshi kanaq abuelïton. ¿Pëkunapita yarpankiku? Davidpa papänimpa shutenqa Jesé ninshi. Papänimpa üshankunatash Davidqa rikan. Rey kanampaq chunka watana Saulta Jehová akrashqanchönash yurinaq David.

‘Belenchö Jesëpa wayinman ëwë especial aceiteki apakurkur. Rey kanampaqmi huk tsurinta akrashqa kä,’ nishpash ninaq Jehová Samuelta. Tsënash, Jesëpa mayor tsurin Eliabta rikärir: ‘Këchi yä,’ ninaq Samuel. Pero ‘ama shumaq këninta ni hatun këninta rikëtsu. Manam pëtatsu rey kanampaq akrashqa kä,’ ninshi Jehová.

Tsënash, Abinadab nishqan tsurinta qayarirnin Jesé aparapunaq Samuelpaq. Pero ‘pëtapis manam akrashqatsu Jehová,’ ninshi Samuel. Tsëpitanash Samah nishqan tsurinta aparapunaq Jesé. ‘Manam ni pëtapistsu Jehová akrashqa,’ ninshi Samuel. Tsënönash qanchis tsurinkunata apapushqa kanaq Samuelpaq, pero manash ni mëqanta Jehová akranaqtsu. ‘¿Këkunallaku llapan tsurikikuna kayan?,’ nishpash Samuel tapunaq.

‘Más joven kaqran pishin. Üshakunata rikarmi pëqa këkan,’ ninshi Jesé. Davidta aparayämuptinshi, shumaq kanqanta rikärin Samuel. Tsënash, ‘këmi,’ ‘pëpa peqanman aceiten hichëki,’ ninaq Jehová Samuelta. Y tsënöshi ruranaq Samuel. Tiempowannash Israelpa reynin tikrarenqa David.