YAPËSHI Israelwan peleayänampaq shayämun filistëokuna. Kananqa Saulpa soldädonkunash kayan Davidpa kima punta wawqinkuna. Tsëshi, ‘ëwar wawqikikuna imanö këkäyanqantapis rikärami tantankuna y gränonkuna apakurkur,’ nishpa ninaq Jesé Davidta.

Tsënash campamentoman chärir wawqinkunata ashir qallëkunaq. Tsënö këkaptinnash israelïtakunata allqutsar Goliat nishqan filisteo nuna yarqaramunaq. Kënöllash 40 hunaq rurakïkashqa ampipapis qoyapapis. ‘Noqawan maqanakuyänäpaq akrayämi pitapis. Pë ëwatsimarnï wanutsimaptenqa esclävïkikunam kayäshaq. Pero noqa ëwatsir wanïkatsiptëqa, llapëkikunam esclävökuna kayanki. Këpaq pita karpis akrayämi,’ nishpash qaparikachaq.

Tsëta wiyarirnash: ‘¿Kë penqakïpita Israel libraq y kë filisteo wanïkatseq nunataqa imanraq qoyanqa?,’ nishpa David tapukunaq wakin soldädokunata.

‘Imëkampis qoykonqash.’ ‘Hina warmimpaqshi qoykonqa rey Saúl warmi tsurintapis,’ ninshi huk soldado.

Pero alläpa hatun nuna kaptinshi mantsayan israelïtakuna Goliatta. Kima metronöshi medimpis, escüdontapis huk soldädoraqshi apapun.

‘Goliatwan peleëtam munan Davidqa,’ nishpash rey Saulta willariyan soldädonkuna. Pero ‘qamqa manam puëdenkitsu. Wambrallaran kanki, y imëpis Goliatqa soldädom kashqa,’ ninshi Saúl. Tsënash, ‘papänïpa üshan apakoq huk leonta y huk ösotapis wanutsishqam kä. Tsëkunanöllachi kanqa kë filistëopis. Jehovämi yanapamanqa,’ nishpash nin David. Tsënash, ‘ëwë, y qamwan Jehová këkutsun,’ nin Saúl.

Tsënö niptinnash, Davidqa pitsqa luchoq rumikunata mayuman yarpurïkur ëlluramurnin pikshanman winarinaq. Tsëpitanash hatun nunawan peleanampaq warakanwan lloqaramunaq. Manash Goliatqa creirintsu. Davidta wanutsiqa manash alläpa sasanötsu parecipunaq.

Tsëshi, ‘këman shamï’ ‘animalkunatawan pishqukunatam cuerpïkitapis qarashaq,’ nishpa ninaq Goliat. Pero Davidqa: ‘Huk jabalïnawan, huk lanzawan y huk espädawanmi noqaman shamunki, pero noqaqa Jehoväpa shutinwanmi qamman shamü. Kananmi Jehová permitïkonqa wanuratsinaqpaq,’ nishpash ninaq Goliatta.

Kanannash Goliatman David ëqïkunaq. Pikshampita huk rumita horqarirshi, warakanman churarkur llapan kallpanwan warakëkunaq Goliatta. ¡Goliatpa peqanman rumi yëkurirshi wanuratsinaq! Llapampitapis más puëdeq pushaqninkuna ishkireqta rikarshi safakuyänaq filistëokuna. Y tsënash israelïtakuna qatiparnin ganariyänaq.