¿MUSYANKIKU imanir kë nuna röpanta rachikïkanqanta? Tsënö ruranampaq Jehová nishqa kaptinshi. Këqa Teyta Diospa profëtan Ahías shutiyoq nunash. ¿Ima huk profeta kanqanta musyankiku? Huk profëtaqa, Teyta Dios puntallata ima pasanantapis willanan nunash.

Jeroboán shutiyoq nunawanshi këchö Ahïasqa parlëkan. Jeroboanqa templota rurar Salomón inshenqan nunash. Tsëshi nänichö Jeroboanwan Ahías toparirnin, imëpis mana ruranatanö rurëkun. Mushoq röpanta qoturirshi chunka ishkë pedäzoman rachirinaq. Tsëpitanash, ‘qampaq chunka pedäzota apakï,’ nishpa ninaq Jeroboanta. ¿Imanir-raq Jeroboanta qoykun chunka pedäzota, musyankiku?

Salomonta Jehová reinonta qochirinantash käyitsin Ahïasqa. Hina chunka kastakunata Teyta Dios Jeroboanta qonantapis willanaqshi. Këwanqa Salomonpa tsurin Rehoboam ishkë kastakunallatana gobernanantash nikänaq.

Tsënash Jeroboanta Ahías nenqanta musyarïkur Salomón alläpa piñëkunaq. Jeroboantaqa wanïkatsitapis munanshi, tsëshi Egiptota safakunaq. Tsëpitanash wanurinaq Salomón. Pëqa 40 watash rey kanaq, kananqa tsurin Rehoboamnash rey. Y Salomón wanurishqantash Egiptochö këkar Jeroboán musyarinaq, tsënash Israelman kutiramunaq.

Manash alli reytsu Rehoboamqa. Papänin Salomonpitapis más mana allish nunakunawan. Tsënash Rehoboam rikaq ëwayan Jeroboanwan importante nunakuna, israelita nunakunawan más alli kanampaq neq. Pero manash wiyantsu pëqa. Unëpitapis más alläpa mana allish tikrakurin. Tsënash Jeroboanta chunka kastapita nunakuna gobernantenkuna churariyänaq, pero Benjamín y Judá ishkan kastakunapa reyninqa Rehoboamllash.

Tsëpitanash Jerusalén templochö nunankuna Jehová adoraq ëwayänanta munantsu Jeroboán. Tsënash chunka gobernanqan kastakuna adorayänampaq ishkë öropeq wishinkuna rurapunaq. Tsëllanash imëka mana alli rurëkunawampis y wanutsinakïkunawampis huntariyänaq llapan tsë markakuna.

Hina tsë ishkë kastakunachöpis kanshi sasa kawëkuna. Rehoboam rey kanqampita manaraqpis pitsqa wata pasaptinshi, Jerusalenwan peleaq shamun Egiptopa reynin. Tsënash Jehoväpa templompita atska tesörokunata apakunaq. Y manash puntanönatsu tsë temploqa kanaq.