BABILONIAMAN más alli yachaq israelïtakunata rey Nabucodonosor apakonqampitaqa, pasarishqa chunka watanash. ¡Y kanan rikë! Jerusalén markataqa kayëkuyanmi, y Babiloniamanmi apakïkäyan esclavo kayänampaq, mana tsëchö wanoq israelïtakunata.

Yarpakurki, mana alli rurënikikunata mana haqirqa ushakäyankim niyänaqshi profëtakuna. Pero israelïtakunaqa manash profëtakunata wiyakuyänaqtsu. Mana Jehoväta adorashpash mana alli dioskunata adorakïkäyänaq. Tsëshi castigashqa kayänaq. Y llapan mana alli israelïtakuna rurayanqantam profeta Ezequiel willakorqan, tsënöpam musyantsik.

¿Piraq Ezequiel, musyankiku? Chunka wata manaraq Jerusalén ushakaptin Babiloniaman Nabucodonosor apakonqan jövenkunachöshi pëpis këkänaq. Pëtawanshi Danielta y kiman amïgonkunatawan, Sadrac, Mesac y Abednëgota apakuyänaq Babiloniata.

Babiloniachöraq Ezequiel këkaptinshi, Jerusalén templochö mana alli rurëkäyanqanta Jehová rikätsinaq. Huk milagrowanshi kë llapanta ruranaq. Babiloniachöraqshi rasumpëpa Ezequielqa këkänaq, pero llapan templochö pasëkanqantash Jehoväqa rikëkatsinaq. ¡Mantsakëpaqshi llapan rikanqanqa!

‘Rikë templochö llapan nunakuna rakcha y mana alli rurëkäyanqanta.’ ‘Rikë animalkunapa y culebrakunapa dibüjonkunawanmi perqakunapis hunta. ¡Hina adorëkaq israelïtakunatapis rikë!,’ ninshi Jehová Ezequielta. Y kë llapan pasëkanqanta rikarshi qellqanaq Ezequielqa.

‘¿Pakëllapa israelïtakunapa pushaqninkuna rurëkäyanqanta rikankiku?,’ nishpash Ezequielta Jehová tapurinaq. Këtapis pëqa rikarëkanshi. Mana alli dioskunatash 70 nunakuna adorakïkäyan. ‘Jehoväqa kë markapita ewkushqam. Manam rikämantsiktsu,’ niyanmi.

Tsënash, templopa norte kaq punkunchö warmikunata rikäratsin Jehová Ezequielta. Tamuz nishqan mana alli diostash tëkur adorakïkäyan. ¡Rikë Jehoväpa templonman yëkuna punkuchö nunakunata! Ezequielqa rikärinaq 25 nunakunatanöshi. ¡Inti ullumunan lädomanshi qonqurikïkäyänaq Intita adorayänampaq!

‘Manam respetayämantsu kë nunakunaqa.’ ‘¡Manam mana allikunallatatsu rurayan, temploman shamïkur-ran kë llapanta rurëkuyan!’ ‘Kananmi piñakïnïtaqa musyariyanqa. Y ushakäriyaptimpis manam ankupärishaqtsu,’ nishpash ninaq Jehová.

Kë llapanta Jehová Ezequielta rikätsenqampita kima wata pasarishqanllachöshi, israelïtakuna rebelakuriyänaq rey Nabucodonosorpeq. Tsënash, tsë reyqa israelïtakuna ushakätseq yarqun. Huk wata y pullan pasariptinnash, Jerusalenpa perqankunata huchurir limpu llapan markata kayëkuyänaq babiloniokuna. Wakinkunash wanuyänaq y wakinkunatanash apakuyänaq esclavo kayänampaq Babiloniaman.

¿Imanir-raq israelïtakuna kënö ushakäyänampaq Jehová haqirerqan? Jehoväta y leyninkunata mana wiyakuyashqa kayaptinshi. Teyta Dios wiyakïqa alläpa alli kanqantam kë llapan rikätsimantsik.

Israel markachö wallkaqlla quedakuyänantash puntallataqa haqiyänaq. Y kë nunakunata rikänampaqshi, Guedalías nishqan huk judío nunata churanaq rey Nabucodonosor. Pero israelïtakunaqa wanïkatsiyanshi Guedalïasta. Tsënash, kë llapampita babiloniokuna shamïkur ushakätsiyänanta mantsëkuyan israelïtakunaqa. Tsënash pëkunaqa Jeremïasta obliguëkuyan pëkunawan ëwanampaq, y tsënönash Egiptota safakuyan.

Tsënash Israel markachö mana ni huk nunakuna kayannatsu. Y 70 watash tsë markachöqa ni pï tärantsu. Chunyäkïkänaqshi. Pero 70 wata pasariptinshi Jehová änikunaq markanta Jerusalenman kutitsinampaq. Tsëyaqqa, ¿imaraq Babiloniachö pasan israelïtakunata? Mä rikärishun.