REY Jeroboán wanurishqanchönash, alläpa mana alli kayänaq nortechö chunka Israel kastakunata llapan gobernaq reykuna. Pero rey Acab nishqanshi llapampitapis más mana alleqa kanaq. ¿Imanir-raq musyankiku? Warmin Jezabel alläpa mana alli kaptinshi.

Israelïtatsu manash kanaq Jezabelqa. Baal nishqan mana alli dios adoraqshi, y rey Sidón nishqampa tsurinshi kanaq. Tsëshi qowan Acabta, y wakin israelïtakunatapis Baalta adoratsita tïranaq. Atskatash Teyta Diospa profëtankunatapis wanïkatsinaq Jehoväta chikirnin tsë Jezabel warmiqa. Tsëshi wakinqa ratakuyänaq machëkunaman mana wanutsiyänampaq. Imatapis tarita munarqa, pita mëtapis wanïkatseqllanash Jezabelqa.

Huk kutinash alläpa llakishqa këkänaq rey Acab. Tsënash, ‘¿imanirtaq alläpa llakishqa kananqa këkanki?,’ nishpa tapurinaq Jezabel.

Tsënash, ‘Nabot nimanqampitam. Uvas chacranta rantita munaptïmi munamashqatsu,’ nishpa ninaq Acab warmin Jezabelta.

‘Shuyärïkï,’ ‘qampaqmi kanqa,’ ninshi Jezabelqa.

Tsëshi Nabot täranqan markachö mandakoqkunaman: ‘Reytawan Diostam Nabotqa maldecishqa niyänampaq ashiyë mana ni imapaqpis väleq nunakunata’. ‘Y tsëpitana Nabotta wanonqanyaq tsampikïkuyë tsë markapita horqarïkur,’ nishpash cartakunaq Jezabel tsë nunakunaman.

Tsëpitanash Nabot wanushqanta musyarïkur Jezabelqa: ‘Ëwë tsë uvas chacraqa qampaqnam,’ nishpa ninaq Acabta. ¿Manaku rasumpa tsë llapan mana alli ruranqampita Jezabelqa castigashqa kanman?

Tsëshi castiganampaq Jehú nunata Jehová kachanaq. Y Jehú shamunanta musyarïkurshi, kë Jezabel warmiqa shumaqnö rikakunampaq nawintapis pintapäkurinaq. Pero Jehú shamur ventänanchö rikärirshi: ‘¡Urëpa hitarkayämï!,’ ninaq palaciochö nunakunata. Kë dibüjochö rikanqëkinöshi Jehú nenqannö rurayänaq. Y tsënöshi wanurinaq urëpa hitarkayämuptin. Y kënöpash kë mana alli reina Jezabel ushakärinaq.