¿IMANIR-RAQ Jehoväman mañakïkan kë nuna musyankiku? ¿Imanir-raq altarnin nöpanman churashqa kë cartakunata? Ezequías ninshi tsë nunapa shutenqa. Surchö ishkë kastakunapa reyninshi pëqa. Hatun problëmakunachöshi këkan. ¿Imanir-raq?

Asirio soldädokunash nortechö chunka kastakunata limpu ushakätsiyashqana. Alläpa mana alli tsë nunakuna kayaptinshi Jehová kë pasananta haqirinaq. Y kanannash ishkë kasta reinokunawan peleaq shamïkuyashqa asirio soldädokuna.

Ezequías reymanshi cartakaramushqa Asiria markapa reynin. Tsë cartakunatash Teyta Dios nöpanman këchö Ezequías churashqa. Jehoväpitash asikun y mana allitash parlayan kë cartakunaqa, y Ezequïastapis amana noqakunawan peleënatsu ninshi. Tsëshi, ‘kamakoq Yaya Jehová, Asiria reypita salvëkalläyämë, tsënöpam qam hapallëki Teyta Dios kanqëkita musyariyanqa tsë markakuna,’ nishpash mañakun Ezequías. ¿Wiyantsuraq Jehová?

Alli reyshi Ezequïasqa. Pëqa manash chunka kastakunapa reyninnötsu ni rey Acaz mana alli papäninnötsu kanaq, Jehová Diospa llapan leyninkunatash wiyakunaq. Tsënash mañakur ushariptin Jehoväqa profëtan Isaïaswan: ‘Manam Jerusalenman Asiria rey yëkamonqatsu, manam witimonqatsu ni huk soldädollapis. Manam kë markamanqa ni huk flëchallatapis chätsiyämonqatsu,’ nishpa nitsinaq.

Kë dibüjota rikë. ¿Kë wanushqa soldädokunaqa pikunaraq kayan? Asiriokunash. Huk angeltash Jehová Dios kachamunaq, y huk waraqllash, 185.000 asiriokunata wanïkatsinaq tsë ángel. Tsënash Asiria rey ewkunaq.

Tsënöpash tsë ishkë kasta reinokunaqa salvakuyänaq y alli unëshi yamë kakuyänaq. Pero Ezequías wanuriptinshi tsurin Manasés rey tikrarinaq. Kë Manaseswan tsurin Amón nishqanqa alläpa mana alli reykunash kayänaq. Tsëshi mana alli rurëkunawan wanutsikïkuna mirëkunaq patsachö. Tsëshi nunankunalla kë rey Amonta wanuratsiyaptin, kë ishkë kastakunapa reyninqa tikrarinaq tsurin Josías.