DAVID manaraq wanurshi, Jehoväpa templonta imanöpis ruranampaq Teyta Dios nenqanta qonaq tsurin Salomonta. Gobernar qallanqampita chusku watachönash Jehoväpa templonta rurar Salomón qallëkunaq, qanchis wata y pullanchöraqshi ushëkunaq. Tsë templota rurarqa uryëkuyänaq chunka waranqëpayanshi nunakuna, atska qellëta churar rurashqa kayaptinshi alläpa chaniyoq kanaq tsë temploqa, hina rurarnin plätata, örota y atska qellëta inshiyashqa kayaptin.

Tabernäculopanöshi, ishkë principal cuartonkunapis kanaq tsë templopaqa. Pero tabernäculopa cuartonkunapitaqa ishkënöshi kayänaq. Arca del pacto nishqantash más rurinkaq cuartomanqa churatsinaq Salomón, huknin kaq cuartomannash churatsinaq wakin tabernäculochö kaq cösaskunata.

Tsëpitanash templota rurar ushariyaptin fiestata rurëkuyänaq alläpa kushikïwan. Kë dibüjochö rikanqëkinöshi templo nöpanman qonqurïkur Salomón mañakunaq. ‘Manam tsaräshunkitsu llapan ciëlopis,’ ‘¿tsëtsuraq kë templo tsaräshunkiman? Pero aksëqa këtsu kamakoq Teyta Dios, kë templopeq mañakayämuptenqa nunëkikunata wiyëki,’ ninshi Salomón Jehoväta.

Tsënash ciëlopita patsë nina uräramunaq Salomón orakur ushariptin. Llapan sacrificäyanqan animalkunatash ruparinaq. Hina llapan templomanshi chillapyaq aktsi huntarinaq. Këqa huk señalshi kanaq Salomonpa mañakïnin wiyëkanqanta y templowampis kushishqa këkanqanta. Kananqa manash tabernäculomannatsu, templomannash Jehová adoraq shayämun nunakuna.

Atska tiemposh kushishqa nunakuna kawayan Salomón yachëwan gobernaptin. Pero Salomonqa Jehová mana kuyaq huk marka warmikunawanshi casakunaq. ¿Kë santo nöpanchö adorëkaq huk warminta rikankiku? Tsënöpanash huk dioskunata Salomón adoranampaq shonqunta tumakäratsiyänaq kë warmikuna. ¿Musyankiku kanan ima pasar qallëkonqantapis? Alläpa mana allish tikrakurinaq Salomonqa, mananash kushi kushi këta puëdeyannatsu nunakuna.

Kë llapampitash Salomonwan Jehová alläpa piñakurkunaq, tsëshi: ‘Huktam kë reinïkita qochirirniki qoykushaq. Manam kawanqëkiyaqqa rurashaqtsu, tsuriki gobernar qallëkuptinran. Pero manam llapan kë reinïkipa nunankunatatsu tsurikita qochishaq,’ nishpa ninaq. Mä rikärishun imanöshi kë llapan pasanaq.