YARPÄRISHUN Jerusalenman manaraq Esdras kutenqan witsëkunaman. Persiachö täraq más reqishqa israelïtakunaqa kayänaq Mardoqueo nunawan Ester shutiyoq warmish. Reinash Esterqa y reypa qepanman mandakoqnash prïmon Mardoqueo. Mä rikärishun imanöshi kë llapan kanaq.

Wambrallaraq këkaptinshi Esterpa papäninwan mamänin wanukïkuyänaq y tsënash wätakunaq Mardoqueo. Y Susa markachöshi kanaq Persia rey Asuero nishqan nunapa palacion, pëpa sirveqninshi Mardoquëoqa. Huk kutinash, mana wiyakunaqtsu tsë reypa warmin Vasti shutiyoq warmi qowan reyta, tsënö rurëkuptinnash huktana warmin akrarinaq reina kanampaqwan. ¿Pitaraq akrarin musyankiku? Awmi, shumaqllallan Ester warmitash.

¿Rikankiku kë orgulloso nuna nöpanman puktikïkaq nunakunata? Hamán ninshi shutin, Persia markachöqa alläpa reqishqa nunash. Pëqa munan tsë rikëkanqëkinö Mardoquëopis pëman kukukïkunantash. Manash tsënötsu ruran Mardoquëoqa. Y tsënö mana alli nunaman kukïqa manash pëpaqqa allitsu. Tsëshi alläpa piñakurkunaq Hamanqa. Kananmi rikanki ima ruranqantapis.

Tsënash ulikurkurnin israelïtakunapita mana allikunata Hamán willarin reyta. ‘Alläpa mana allim kayan manam leynikitapis wiyakuyantsu,’ ‘wanïkatsishwanmi,’ nishpa. Pero israelita warmin kanqanta manash musyantsu rey Asuëroqa. Tsëshi, Hamanta wiyarnin huk leyta ruraratsinaq israelïtakunata limpu ushakätsiyänampaq.

Tsënash, tsë leypita wiyarïkur Mardoquëoqa alläpa yarparëkunaq. ‘Reyta parlapärir mañakëkallämi salvëkalläyämänampaq,’ nishpash huk willakïta aparatsinaq Esterman. Pero mana rey invitëkaptin palacioman ëwaqtaqa, Persia ley nenqannö wanïkatsiyanmanshi. Y mana invitëkaptinshi Esterqa ëwanaq palaciota. Tsëshi kë reyqa öropeq väranta kamärinaq, tsënöpash musyayan mana wanutsiyänanta. Tsënash Esterqa reytawan Hamanta nirinaq mikoq ëwayänampaq. Tsënash, ‘¿imatataq noqapita munanki?,’ nishpa tapurinaq reyqa Esterta. Tsënash, ‘warë Hamanwan mikoq yapë kutiyämuptikiran nishqëki,’ nishpa ninaq Ester qowan reyta.

Tsënash, ‘markamayïkunatawan noqatam wanïkatsiyämanqa,’ nishpash ninaq Ester qowan reyta tsë mikïchö. Tsëshi, ‘¿pitaq tsëtaqa rurëkonqa?,’ nishpa alläpa piñëkur tapukurinaq.

‘¡Hamanmi tsë chiki mana alli nunaqa!,’ ninshi Ester.

Kananshi reyqa piñëkunaq rasumpëpa. Hamanta wanutsiyänampaqshi mandakurinaq. Tsëpitanash reyqa pë qepanman mandakoq churarinaq Mardoquëota. Tsënash Mardoquëoqa tsë wanutsiyänan hunaq chaptin, kawëninkunarëkur israelïtakuna peleayänampaq huk mushoq leyta ruraratsinaq reywan. Kananqa Mardoqueo reqishqa nuna tikrarishqa kaptinnash, israelïtakunata atska nunakuna yanapayan y chikeqninkunapitapis salvëkuyan.