Huk shumaqllan María shutiyoq alli shipashmanshi Gabriel nishqan ángel shamunaq. ‘Wiñeypaq reynö gobernanampaqmi huk wambrëki kanqa,’ ninaqshi tsë angelqa. Animalkuna llawiränan huk wayichöshi yurinaq tsë wawan Jesusqa, tsëmanshi mitsikoqkuna watukaq shayämunaq. Tsëpitanash, Inti ullumunan lädopeq shamoq nunakunata pushanaq huk estrella. Tsë estrëllata pï rikätsenqantapis y wanutsita tïrayanqampita imanö Jesusta salvayanqantapis yachakushunmi.

Tsëpitanam templochö 12 watayoq këkar maestrokunawan parlëkaqta tarintsik Jesusta. Y tsëpita 18 wata pasariptinnash Jesús bautizakurinaq, y tsëpitanash Reinopita willapäkurnin qallëkunaq papänin tsëta ruranampaq Patsaman kachamonqannö. Y 12 nunakunatash Reinopita willapäkur yanapayänampaq y apostolninkuna kayänampaqwan akrarinaq Jesús.

Hina atska milagrokunatapis ruranaqshi Jesusqa. Y huk ishkë tantakunawan y pescädokunallawanshi waranqëpayan nunakunata qaranaq. Hina wanushqakunatapis kawaritsimunaqshi y qeshyaqkunatapis kachakäratsinaqshi. Kë willakïkuna ushananchönam yachakushun imanö Jesusta wanutsiyanqanta y manaraq wanutsiyaptin ima pasanqantapis. Kima wata pullannöshi Jesús willapäkunaq, 34 watapita ichik más watayoqnöshi pasanaq kë HOQTA kaq Parte nishqan willakïkunachöqa.