¿RIKANKIKU tsë nunakuna rikarëkäyanqan atsikyaq estrëllata? Jerusalenpita pëkuna yarqarayämuptinllash tsë estrëllaqa yuririnaq. Inti yarqamunan lädopitash pëkunaqa shayämun, y estrëllakunatash estudiayan. Tsëshi pëkunaqa alläpa reqishqa piman karpis kë mushoq estrëllaqa pushayänanta pensayänaq.

Jerusalenman tsë nunakuna chärirnash, ‘¿mëchötaq judïokunapa reynin kanampaq yureq wambraqa këkan?,’ nishpa tapukuriyänaq. Hina israelïtakunallatash “Judíos,” nishpapis reqiyänaq. ‘Inti yarqamunan lädopitam estrëllanta rikäyämorqö,’ y tsëmi ‘adoraq shayämorqö,’ niyanshi kë nunakunaqa.

Tsëta wiyarirnash Jerusalenpa reynin Herodes alläpa yarpakachëkunaq. Pëqa pëpa rantin huk rey kananta manash munanaqtsu. Tsënash, ‘¿mëchöraq Cristo yurinan karqan?,’ nishpa tapukurinaq llapan reqishqa sacerdötenkunata qayaratsir. Tsëshi, ‘Belén markachömi ninmi Bibliaqa,’ nishpa yaskiriyänaq.

Tsënash, Inti yarqamoq lädopita shamoq nunakunata: ‘Tsë wambrata ashir tarirïkorqa willarayämanki, noqapis adoraq ëwëtam munä,’ nishpash ninaq Herodes. ¡Pero rasumpëpaqa tsë wambrataqa wanïkatsitash munanaq!

Tsëpitanash, Belén markayaq nunakunata pushanaq tsë estrëllaqa, y wambra këkanqan wayi hananchöshi pärarinaq. Y wayiman yëkurirnash nunakunaqa Jesustawan maman Marïata taririyänaq. Tsëchöshi Jesustaqa imëka qarëninkunapis qoykuyänaq. Pero tsëpitanash, ‘Herodes kaqtaqa ama kutiyëtsu,’ nishpash Jehová alleq willëkunaq suëñïninkunachö tsë nunakunata. Tsëshi huk nänipana kutikuyänaq markankunata.

Nunakuna ewkuyanqanta musyarirnash, alläpa piñëkunaq Herödesqa. ‘Ishkë watayoqpita urëpa kaq llapan Belenchö wambrakunata wanïkatsiyë,’ nishpash mandakunaq. Pero suëñïninchöshi Jehoväqa Josëta willarinaq, y tsëshi Egiptota Josëqa ewkunaq Jesustawan Marïata apakurkur. Tsëpitanash Herodes wanurishqanta musyarirnin, Nazaret markaman kutitsikamunaq warmin Marïatawan Jesusta. Y kë Nazaret markachöshi Jesusqa winanaq.

¿Piraq kë mushoq estrëllata chipapätserqa? Yarpë, tsë estrëllata rikarshi puntataqa nunakuna ëwayänaq Jerusalenta. Teyta Diospa Tsurintash wanutsita munanaq Satanás Diabloqa. Musyanaqshi Jerusalenpa reynin Herodes wanutsita tïrananta. Tsëpenqa, tsë estrella chipapätseqqa Satanasshi kanaq.