¡KË MANTSAKËPAQ pasëkanqanta rikë! Jesustash wanïkätsiyan. Huk qeruchömi warkurëkan. Chakinchöpis y makinchöpis clävokunam yakarëkan. ¿Imanir-raq kënö rurëkïtaqa pipis munanman?

Chikirshi. ¿Pikunaraq chikiyan? Satanás Diablosh hukqa. Pëshi hina Jehoväta Adán Eva mana wiyakuyänampaqpis ruranaq. Tsënöllash hina Jesusta tsë mana alli chikeqninkuna wanïkatsiyänampaqpis ruranaq.

Y imëka mana allitapis rurëkuyanshi Jesustaqa chikeqninkunaqa manaraq qeruman clavar. ¿Getsemaní huertaman shamïkur apakuyanqanta yarpankiku? ¿Kë chikeqninkuna pikunaraq kayarqan? Religiösokunapa tsë pushaqninkunash kayänaq. Mä rikärishun imash tsëpita pasanaq.

Apostolninkunaqa safakuyänaqshi tsë religiösokuna Jesusta apakuyaptin. Mantsakarshi chikeqninkunatawan hapallanta haqiriyänaq. Pero manash alläpa karutatsu ewkuyänaq Juanwan Pedroqa. Qepanllatash ëwayänaq Jesusta ima pasanantapis rikäyänampaq.

Unë sumo sacerdote awkis Anás kaqtash Jesusta apayänaq sacerdötekuna. Manash alläpa unëtsu këchö nunakunaqa kayan. Kanan sumo sacerdöteqa Caifás nishqannash y tsëpa wayintanash apayan Jesusta. Tsëchöqa selläma atskash uli sacerdötekuna kayänaq.

Y huk juiciosh kan tsë Caifaspa wayinchöqa. Jesuspita ulikurkur parlaq nunakunatash tsëman apayämun. ‘Jesusta wanïkatsishun,’ nishpash kutarnin toqapïkäriyanaq qaqllachö tsë llapan nuna pushaq religiösokuna o sacerdötekuna.

Waqta patiollachöshi këkan Pëdroqa kë llapan pasëkaptin. Y tsëchönash nunakuna ninata tsaritsiyan alläpa alalaptin. Tsë ninachö qoñükïkarnash, ‘Jesuswanmi kë nunapis këkarqan,’ nishpa nïkunaq huk sirvienta Pëdrota rikärir.

Tsënash Pëdroqa, ‘¡manam, manam noqaqa pëwantsu këkarqä!,’ nishpa ninaq.

Kima kutish, ‘Jesuswantaq këkarqëki,’ niyan nunakunaqa Pëdrota. Pero ‘manam pëwantsu këkarqa,’ ninshi Pëdroqa cada niyaptin. Y tsënash, Jesusqa tumëkur rikärinaq kima kuti manam nirishqa këkaptin. Tsëpitanash ulikïnimpita alläpa llakirnin, ewkur waqakïkunaq Pedro.

Viernes qoya Inti ulluramuptinnash, Sanedrín wayinkunaman sacerdötekunaqa Jesusta apayänaq. Tsëchöshi ima rurayänantapis parlayänaq. Tsëpitanash Judea markapa gobernaqnin Poncio Pilätoman apayänaq.

Tsëchönash, ‘alläpa mana allim kë nunaqa, wanïkatsishun,’ niyan Pilätota. Tsënash alleq tapupärir, ‘manam ni ima mana allita kë nunachöqa rikätsu,’ nishpa ninaq Pilato. Tsëllanash, Jerusalenchö Galilea markapa mandakoqnin Herodes Antipas këkaqman, Jesusta apëkatsinaq Pilätoqa. Hina manash ni ima mana allitapis tarintsu Jesuschöqa kë mandakoq Herodes Antïpaspis, tsëshi kutïkatsin Pilato kaqta.

Tsënash Jesusta haqirita munan Pilätoqa. Pero llawirëkaq suwa Barrabasta Pilato kacharinantash munayan Jesusta chikeq nunakunaqa. Y tsënö këkarnash, ‘¡rikäyë! ¡Reynikikunata!,’ nishpa pullan hunaqnöna Jesusta waqtaman Pilato horqaramunaq. Tsënash, ‘¡horqë! ¡Wanïkatsi!,’ nishpa niyänaq sacerdötekuna. Tsënöshi wanutsiyänampaq apakuyänaq Jesusta y Barrabasnash yarqurinaq.

Tsënönash clavariyänaq huk qeruman viernes tardepa. Manam rikankitsu tsë dibüjochöqa, pero Jesuspa ishkan lädonmanshi qeruchö clavayänaq ishkë mana alli nunakunatapis. Jesús manaraq wanuptinshi: ‘Reinïkiman yëkurir yarpäramanki,’ nishpa ninaq huknin mana alli nuna. Tsënash Jesusqa, ‘Paraïsochömi noqawan këkanki,’ nishpa ninaq.

¡Imanö shumaqmi kë änikïqa! ¿Manaku tsënö parecipushunki? ¿Ima paraïsopaqraq Jesús këchö parlëkarqan? ¿Mëchöraq punta Teyta Dios paraíso ruranqan këkarqan? Kë Patsachöshi. Ciëlochö Jesús reinamurshi, kë Patsachö yapë shumaq huertata ruramonqa, tsëmanshi tsë nunata kawariratsimonqa. ¿Manaku këqa alläpa alli?