SAMARIA pozo kaqchöshi Jesús hamakurinaq. Mikï rantipakoq discïpulonkuna ëwayanqanyaq. Yaku horqaqshi shamushqa kanaq Jesuswan parlëkaq warmiqa. Tsëshi, ‘yakullä qarëkamë,’ nishpa ninaq Jesús.

Tsënash tsë warmiqa espantakunaq. ¿Imanir-raq musyankiku? Judïosh Jesusqa, warminash samaritana. Y samaritänokunataqa chikipäyanshi judïokuna. ¡Manash parlapäyampistsu! Pero tukïläya nunakunatash Jesusqa kuyan. Tsëshi, ‘yaku mañakushoqniki pï kanqanta musyarqa, kikikim yakuta mañakunkiman, y kawë yakutam qoshunkiman,’ nishpa ninaq.

Tsënash, ‘tëtë, baldekillapis manam kantsu y pözopis alläpa rurim. ¿Mëchöraq kë kawëpaq yakutaqa tarinkiman?,’ nishpa ninaq kë samaritänaqa.

‘Yapëpis yakunärinkillam kë pözopita yakuta uporqa. Pero wiñeypaq kawëtam tarinkiman noqa qonqaq yakuta uporqa,’ nishpash Jesús käyitsinaq.

Y warminash, ‘¡tsë yakullä tëtë! Tsëqa manam ni imëpis yakunäshaqnatsu. Manam yaku horqaq yapë këta shallämushaqnatsu,’ nishpa ninaq.

Rasumpëpa kaq yakupita parlapëkanqantash pensanaq tsë warmiqa. Pero Teyta Diospita y reinon kawëpaq yakunö kanqampitash parlapëkänaq rasumpëpaqa. Y wiñeypaq kawëtash tarinman.

Tsënash, ‘qowëkita qayaramur këman kutimï,’ nishpa ninaq Jesús.

‘Qowä manam noqapaqa kantsu,’ nishpa ninaq tsë warmiqa.

Jesusnash, ‘allim tsënö ninki, pero qowëkikunaqa pitsqam kashqa, y manam qowëkitsu kanan tëkanqëki nunapis,’ nishpa ninaq.

Rasumpëpa kë llapan nenqan kaptinshi, selläma mantsakëkunaq kë warmiqa. ¿Jesusqa imanöraq kë llapanta musyarqa? Jehová Diospa kachamushqan karshi, tsëshi kë llapanta willarinaq Teyta Dios. Kanannash discïpulonkuna kutirirnin taririyänaq huk samaritänawan parlëkaqta, tsënash selläma espantëkuyänaq.

¿Kë llapampita imataraq yachakuntsik? Tukïläya nunakunatapis Jesús kuyanqantam. Tsënöshi noqantsikpis kashwan, manash huk markapita o kastapita kayanqanrëkurqa mana allim kayan nishwantsu. Wiñeypaq kawëman apakoq rasumpëpa yachakïta tariyänantash munan Jesusqa. Y tsënöshi noqantsikpis llapan nunakuna yachatsita tïrashwan.